မိလျးထဝ် – တ္ၚဲယးတေံမ္ဂး ဗော်ဍုၚ်မန်တၟိ ကၠောန်သ္ပကောံဓရီု ကမ္မတဳဗဟဵု လၟေၚ်တြဴဂိတုမွဲဝါ ပ္ဍဲကဵုဌာန်ဂအုပ်ဗဟဵု ကၞောတ်ၜဳရေဝ်ရောၚ် ဂွံတီကေတ် နူညးမၞုံအခေါၚ်ဟီုဂး ဗော်ဍုၚ်မန်တၟိရ။
အပ္ဍဲကောံဓရီု ပွိုၚ်မွဲသတ္တဟဂှ် ကလေၚ်သ္ၚဳဂၠိပ် ပရေၚ်ကမၠောန် ပွိုၚ်တြဴဂိတုတုဲ စပ်ကဵုကိစ္စဗော်ရပ်လွဟ်ပံၚ်ကောံ ကောန်ဂကူကောန်ဍုၚ်အရၚ်တံ သာ်လဵုဂွံချဳဒရာၚ်အာ အဓာန်ဂတတေံဂှ်လေဝ် သဳကၠဳအာကီုရောၚ် နာဲဟံသာဗိုန်ခိုၚ် ဟီုရ။
သွက်သ္ဂောံထပ်ဗပေၚ်အာ ဒၞာဲတာလျိုၚ် ကေၚ်ကာဗဟဵု ယုတ်ဒေက်မံၚ်ဂှ် အစဳအဇန် ဟွံမွဲဏီကီုလေဝ် ပၟိက်ဇၞော်မ္ဂး ပ္ဍဲကောံဓရီု ကမ္မတဳ ဗဟဵုဏံ ထပ်ဗပေၚ်အာမာန်ရောၚ် ကေၚ်ကာဗဟဵု ဗော်ဍုၚ်မန်တၟိ နာဲတၠညး ကေၚ်ဟီုလဝ်ကဵု ဌာန်ပရိုၚ်ဗၠးၜးမန်ရ။
လၟုဟ်ပြဟ်ပြဟ်ဏံ ပ္ဍဲဗော်ဍုၚ်မန်တၟိ ကေၚ်ကာဗဟဵု ယုတ်ဒေက်မံၚ် ၂ တၠရ။
မွဲအခိၚ်ကဵု ကောံဓရီု ကမ္မတဳ ဗဟဵုဏံဂှ် သီုကဵုကၠောန်သ္ပကောံဓရီု ညးအာက္ဍိုပ်ပရေၚ်ပၞာန် ပ္ဍဲဌာန်ဂအုပ်ဗဟဵုကီုရောၚ် ဂွံတီကေတ်ရ။
“ကောံဓရီုဏံ တုဲအာတှေ် ပရေၚ်ကမၠောန်မွဲမွဲ ဍေံမံက်ကၠုၚ်ဏောၚ်၊ ကမၠောန်ဏံဂှ် မၞိဟ်တာလျိုၚ် အာက္ဍိုပ်တံ ဆက်တုဲ ဓမံက်အာရုပ်ရဴဏောၚ်” သာ်ဝွံ နာဲဟံသာဗိုန်ခိုၚ် ဟီုရ။
သၞာံတုဲတုဲကၠုၚ်တေံဂမၠိုၚ်ဂှ် ကောံဓရီု ကမ္မတဳဗဟဵုကဵု ကောံဓရီု ညးအာက္ဍိုပ်ပရေၚ်ပၞာန်တံ ကၠောန်ဗဒှ်အခိၚ် ဟွံတုပ်ရ။ ဟိုတ်နူအကာဲအရာတၟေၚ် နွံတုဲ ကၠောန်ဗဒှ် ကောံဓရီု မွဲအခိၚ်ဓဝ်ရောၚ် ဂွံမိၚ်ကေတ်ရ။
အခိၚ်ဒပ်ပၞာန်သေံဇၞော် ဒိုဟ်သၟဝ်ကျာတံ ဒးဒုၚ်မံၚ်မုက်ပၞာန်ကဵု အလဵုအသဳပၞာန်ဗၟာဏံဂှ် ညံၚ်ဂွံဒှ်အထံက်အရီုတုဲ ဗော်ဍုၚ်မန်တၟိ၊ ဒပ်ပၞာန်ကရေၚ် ဒဳကေဗဳအေ ကေုာံ ဒပ်ပၞာန်ကရေၚ် ကေအေန်ယူတံ ပညဳပညပ်သဳကၠဳမံၚ် သွက်ဂွံပံက်မုက်ပၞာန်တၟိကဵု အလဵုအသဳပၞာန် နွံရောၚ် ပရိုၚ်ကောလာဟလ တိတ်မံၚ်ရ။
ပ္ဍဲသၞောဝ် ဗော်ဍုၚ်မန်တၟိမ္ဂး ကမ္မတဳ ဗဟဵု ၂၇ တၠ၊ အရန် ၅ တၠ ပါလုပ်တုဲ အပ္ဍဲကမ္မတဳဗဟဵုဂှ် ကေၚ်ကာဗဟဵု ပါလုပ် ၉ တၠရ။