ဌာန်ပရိုၚ်ဗၠးၜးမန် – သ္ကိုပ်ဝန်ဇၞော်တ္ၚဵုရးဍုၚ်မန် ဥူအုၚ်မျေအ်၊ ဝန်ဇၞော်သဝ်ဝန်နဲသိုဝ် ကေုာံ ဝန်ဇၞော်နာဲလွဳအံၚ်တံ ပ္ဍဲဂိတုအေဗရာ ၁၇ ဏံ အာဂဇံက် မခၟောံဗိုတ် ပတိုန်က္ဍိုၚ်ကျာ် ကုစေတဳကျာ်ဇြာ၊ လဒေါဝ်ကွာန်ကၟာဝက်၊ ပွိုၚ်ဍုၚ်မုဟ်ဍုၚ်ဂှ် ဂွံတီလဝ် နူညးတိုန်စိုပ်တံရ။
“ပိုဲဆဂွံပတန်လဝ် အလဵုအသဳတၟိရ၊ အလဵုအသဳတၟိပိုဲတံဂှ် သိုၚ်ခၞံကဵု ပရေၚ်ၜိုဟ်လလံ ကေုာံ ပရေၚ်ဇၞော်မောဝ်တဴတက် ပရၚ်ညိၚ်ဝတ် ပ္ဍဲတွဵုရးဍုၚ်မန်ရောၚ်” သာ်ဝွံ သ္ကိုပ်ဝန်ဇၞော် တ္ၚဵုရးဍုၚ်မန် ဟီုဏာဂလာန် ပ္ဍဲသဘၚ်ပတိုန်က္ဍိုၚ်ကျာ်ဂှ်ရ။
နကဵုခမဳသၚ်မန် ပ္ဍဲကွာန်ကၟာဝက်တအ် သ္ပရှေ်သှေ်ကဵု သ္ကိုပ်ဝန်ဇၞော်တုဲ ကဵုဏာအခေါၚ် ရပ်မခၟောံဗိုတ်ကီု သီုကဵုဝန်ဇၞော်မန်ၜါတၠ သဝ်ဝန်နဲသဵု ကေုာံ နာဲလွဳအံၚ်တံဂှ်လေဝ် ပါလုပ် ကရောံရပ်ကပေါတ် က္ဍိုၚ်ကျာ်ဇြာဂှ်ကီု ဂွံတီကေတ်ရ။
ဟိုတ်နူ သ္ကိုပ်ဝန်ဇၞော် တ္ၚဵုရးဍုၚ်မန် ဥူအုၚ်မျေအ် ပါလုပ်ဒၟံၚ် ပ္ဍဲသဘၚ်ဖျေံက္ဍိုၚ်ကျာ်ဏံတုဲ ခမဳသၚ်မန်တအ် ဒးကဵုသဳ ဘာသာမန် သီုဘာသာဗၟာ ၜါဘာသာဂှ် ဒါယကာလ္ၚဵုတံ ဟွံပေၚ်တဴစိုတ် နွံကီုရ။
“ခမဳသၚ်မန်ဂှ် ဒးကဵုသဳ ဗီုဘာသာမန်ရ၊ မုပကဵုသဳဗတ်ဗၟာရော၊ ဟိုတ်နူဍေံ ဒးကဵုသဳဗၟာတှေ် ကမၠောန်ဟွံဒှ်၊ ကွာန်ပိုဲဏံကွာန်မန်ဏောၚ်” မၞိဟ်တိုန်စိုပ် ပ္ဍဲသဘၚ်ကၞာဂှ်မွဲတၠ အဃောဒဂိုန်ဗက်မံၚ်သဳဂှ် ဟီုတဴသာ်ဏံရ။
ညးဍုၚ်ကွာန် ကောန်ဂကူမန်တံ ဗိုက်လတက်လဝ် ကယျိုၚ်မန် ဗုဍာဲတုဲ အပ္ဍဲဒုၚ်တၠုၚ်မံၚ်ဂှ် ဥူအုၚ်မျေအ် ဆက်မိက်ဏာ ကုပရိသာတ်မန် “မ္ၚဵုရအဴ” နကဵုဘာသာမန်ရ။ ၜိုန်ရဇာတိညး ပ္ဍဲဍုၚ်မုဟ်ဍုၚ် ဒှ်မၞိဟ်ကရောံဂကူမန် ဟီုကီုလေဝ် အရေဝ်မန်ဂှ် “မ္ၚဵုရအဴ” မွဲပါၚ်ဟေၚ် ညးဟီုဂွံရ။
ဝန်ဇၞော်မန်ၜါဂှ် ကျိုၚ်လဝ် ဗွိုက်လတက် ကယျိုၚ်ကယျဝ်မန်ကီုလေဝ် သ္ကိုပ်ဝန်ဇၞော် တ္ၚဵုရးဍုၚ်မန် ဥူအုၚ်မျေအ်ဂှ် ဗိုက်လတက်လဝ် ကယျိုၚ်ကယျဝ်ဗၟာရ။
ဝန်ဇၞော်မန်ၜါတၠဂှ် ကၠုၚ်နူဗော်ဒဳမဝ်ကရေဇြဳ အလုံရးမန်တုဲ ဂွံလဝ်ဇၞး ပ္ဍဲပေါဲရုဲမာဲ ၂၀၁၀ ဏံဂှ်ရ ဂွံအခေါၚ်ပါလုပ်ကၠုၚ် ပ္ဍဲဂကောံအလဵုအသဳ တွဵုရးဍုၚ်မန်လၟုဟ်ဏံရ။
အပ္ဍဲပေါဲရုဲမာဲ ၂၀၁၀ ဏံဝွံ နကဵုဗော်ဒဳမဝ်ကရေဇြဳ အလုံရးမန် လုပ်ပြိုၚ်ညးစၞးအမာတ် ၃၄ တၠဂှ် ဂွံဇၞးကၠုၚ် ၁၆ တၠဟေၚ်ရ။