မာံသုတ – ပ္ဍဲဍုၚ်ဗၟာ သွက်ဂွံဓမံက်ပတိုန် ပရေၚ်ၜိုဟ်လလမ်ကေုာံ ပရေၚ်ပခိုၚ်ဇြဟတ် ဂကောံပြဝါမၞိဟ်တၟးဖ္ဍး ရန်တုဲ ဂကောံကွးဘာ ၈၈ နာဲမေန်ကိုဝ်နာၚ် ဍိုက်က္ဍိုပ်တံဂှ် နူတနေံဏံ ကၠောန်သ္ပပေဲါဆဵုဂဗသောၚ်ကလး ညးဍုၚ်ကွာန် ပ္ဍဲဇြပ်သဘၚ်ဓရ်မန် ဍုၚ်ဇြပ်ဗုရ။
ပ္ဍဲအသေအဟာန်ဂှ်မ္ဂး ညးစၞး နူဗော်ဍုၚ်မန်တၟိ၊ ဗော်ဒဳမဵုကရေဇြဳ အလုံရးမန်၊ ဗော်ဒဳမဝ်ကရေသဳမန်၊ ဗော်ဂဥုပ်ဒဳမဝ်ကရေဇြဳ ကောန်ဂကူ NLD၊ ဂကောံလိက်ပတ်ယေန်သၞာၚ် နူကွာန် မၞုံအပ္ဍဲပွိုၚ်ဍုၚ်ဇြပ်ဗုနာနာ သီုဖအိုတ် လၟိဟ်ၜိုတ် ၅၀၀ တၠ တိုန်စိုပ်ရောၚ်ဂှ် ညးလျိုၚ်ထိၚ်ဒဝ်မၚ်မွဲ ဇြပ်သဘၚ်ဓရ်မန် နာဲဆာန်ဨ ဟီုရ။
“ညးတံ ဟီုဏာအဓိကဂှ် ပ္ဍဲကာလပြံၚ်လှာဲ ဒဳမဝ်ကရေဇြဳဏံ ညးဍုၚ်ကွာန် သီုဖအိုတ် ဂွံပံၚ်ကောံ ပါလုပ်ဂှ် ပၟိက်ဇၞော်မံၚ်ဏောၚ်။ ပ္ဍဲလက်ထက်အလဵုအသဳတၟိဏံဂှ် တၚ်နၚ်ဆေၚ်စပ်ကဵု အခေါၚ်အရာမၞိဟ်တံ ခိုဟ်ကၠုၚ်မံၚ် ဟီုကၠာလေဝ် အာဲပရေံပရေံ သှေ်ကၠုၚ်မံၚ် နူလက်ထက်အလဵုအသဳပၞာန်တံဂှ် ညးဍုၚ်ကွာန်တံ ဒးဒုၚ်စသိုၚ်မံၚ်ဖိုဟ်ဏောၚ်ဂှ် ညးတံ တီမံၚ်ဏောဝ် ညးတံ ဟီု” သာ်ဝွံ နာဲဆာန်ဨ ဟီုရ။
ပ္ဍဲပေဲါဆဵုဂဗသောၚ်ကလးဏံဂှ် နူဗော် NLD ဥူဉာဏ်ဟိၚ်၊ က္ဍိုပ်သကိုပ် ကွးဘာ ၈၈ နာဲမေန်ဇေယျ၊ နာဲမေန်ကိုဝ်နာၚ်တံ ဟီုဂလာန်အိုတ်ရ။
“ကိစႊဒးဒုၚ်သီလဝ် တိကၠအ်တံ၊ ကိစ္စဥက္ကဋ္ဌကွာန် သွံစလဝ် တိပွေၚ်တံဂှ် ညးဍုၚ်ကွာန် ၃ တၠ ပတိုန်ထ္ၜးကဵု ကွးဘာ ၈၈ တံကီု” သာ်ဝွံ နာဲဆာန်ဨ ဆက်ဟီုရ။
ကြဴနူဂှ်မ္ဂး ဂကောံကွးဘာ ၈၈ မပါ ၁၆ တၠတံဂှ် အာဍုၚ်ကျာ်ခမဳတုဲ ဆက်အာတရဴ ဍုၚ်ရေဝ်ရောၚ် ဂွံတီကေတ်ရ။
တုပ်တဴသာ်ဂှ်ကီု နူတနိ အခိၚ်ဗ္တံဂှ်လေဝ် ပ္ဍဲဇြပ်သဘၚ်ဓရ် မၞုံပ္ဍဲဇြပ်ဇၞူအံၚ်ဓမ္မ၊ ဍုၚ်မုဟ်ဍုၚ်ဂှ် ညးစိုတ်လုပ်စကဵုဒဳ မဝ်ကရေဇြဳဂမၠိုၚ်၊ သၟတ်ပွိုၚ်ဍုၚ်မုဟ်ဍုၚ်ဂမၠိုၚ်၊ ညးဍုၚ်ကွာန်ဂမၠိုၚ် သီုဖအိုတ် လၟိဟ်ၜိုတ် ၄၀၀ တၠ ဆဵုဂဗကဵု ဂကောံကွးဘာ ၈၈ တံကီုရ။
သာ်ဂှ်ကီု နူတနိ လဒေါဝ်တ္ၚဲဂှ်လေဝ် ပ္ဍဲဘာတိုက်ဇေတဝန်၊ ဍုၚ်ကျာ်မြဟ်ဂှ် ဂကောံကွးဘာတံ ဟီုဂလာန် ကုခမဳသၚ်ဂမၠိုၚ်၊ ညးဒေသဂမၠိုၚ် စပ်ကဵုကိစ္စဓမံက်ပတိုန် ပရေၚ်ၜိုဟ်လလမ်ကေုာံ ပရေၚ်ပခိုၚ်ဇြဟတ် ဂကောံပြဝါမၞိဟ်တၟးဖ္ဍးကီုရောၚ်ဂှ် ဓမံက်ထ္ၜးလဝ် ပ္ဍဲမုက်လိက်အေန်တာနိတ် ဂျာနယ်သြၚ်လောန်တာၚ်မ်ကီုရ။
တရဴတွဵုရးမန် ဂကောံကွးဘာတံဝွံ စနူဂိတုနဝ်ဝေမ်ပါတုဲ ပ္ဍဲမွဲတ္ၚဲဂှ်ဟေၚ် စိုပ်ကၠုၚ်ၜဳကလေၚ်၊ ကျာ်ထဝ်၊ သဓီု၊ ပံၚ် ကေုာံ ဍုၚ်မတ်မလီုတံရ။
ပ္ဍဲလၟေၚ်တရဴညးတံဂှ်မ္ဂး ပ္ဍဲကာလပြံၚ်လှာဲဒဳမဝ်ကရေဇြဳဏံ ကၟိန်ဍုၚ်ညံၚ်သ္ဂောံဖောအ်ဗြေဝ်တဴတက်အာမာန်ဂှ် ဂကောံပြဝါမၞိဟ်လေဝ် ဟွံမွဲဟွံတုဲ ဒးပါလုပ်ကီုတုဲ အလုံညးဍုၚ်ကွာန်ဖအိုတ် ဒးပါလုပ်ထေက်ရောၚ်၊ အကြာညးဍုၚ်ကွာန် ယေန်သၞာၚ်ဒဳမဝ်ကရေဇြဳကေုာံ ဂကောံပြဝါမၞိဟ်တၟးဖ္ဍးလေဝ် ဒးနွံထေက်ရောၚ်ဂှ် သ္ပအဓိကသဳကၠဳဏာရောၚ် ဂွံတီကေတ်ရ။