မာံတဵုလွဳ – ပ္ဍဲတွဵုရးမန်ဂှ် သ္ပပတမ်နူဂိတုအံက်တဝ်ပါတုဲ တၠကၠအ်ဗ္ၜိုတ်တံ စကွာတ်ဗ္ၜိုတ်ကီုလေဝ် ဟိုတ်နူဥတုရာသဳ ကတဴကတာန်တုဲ ဗ္ၜိုတ်တိတ် အောန်နူသၞာံအာတေံဏီဂှ်ရ တၠကၠအ်ဗ္ၜိုတ်တံ ကရောတ်ကသဝ်မံၚ်အိုတ်ရ။
“မွဲကဝါတ် တၞံဇၞော် ၜိုတ် (၄၀၀) တှေ် သၞာံအာတေံ အခိၚ်ဏံတှေ် မွဲတ္ၚဲဗ္ၜိုတ်တိတ် ၜိုတ် (၃၀) ပံၚ်၊ သၞာံဏံ ကွာတ်ဂွံၜိုတ်ၜါဂိတုရ၊ ဆဂး မွဲတ္ၚဲတှေ် ဗ္ၜိုတ်တိတ် ၜိုတ် ၂၂ ပံၚ်ဓဝ်” သာ်ဝွံ တၠကၠအ်ဗ္ၜိုတ် ကွာန်ဒဒန်ချေတ် ပွိုၚ်ဍုၚ်ဇြပ်ဗု နာဲအံၚ် ဟီုရ။
ဗ္ၜိုတ်ညံၚ်သ္ဂောံတိတ်ဂၠိုၚ်ဂှ် ၜိုန်ရတၠကၠအ်ဗ္ၜိုတ်တံ လွဳလွတ်ဗ္စကၠုၚ် ဝဲါဓါတ်ကီုလေဝ် ဗ္ၜိုတ်ဆက် မတ်တံကီု ဗ္ၜိုတ်မအရိုၚ်တံကီု ဗ္ၜိုတ်တိတ်အောန်မံၚ် မွဲသၞောတ်ဓဝ်ရောၚ် ညးသ္ဂးရ။
ပ္ဍဲတွဵုရးမန်မ္ဂး အပ္ဍဲပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်ရေဝ်တံဂှ် တဵုလဝ်ဗ္ၜိုတ် ဂၠိုၚ်ကဵုလ္ၚီဨကတုဲ ဗ္ၜိုတ်တိတ်အောန်မံၚ် သီုဖအိုတ်ရောၚ်ဂှ် ဂွံတီကေတ် နူတၠကၠအ်ဗ္ၜိုတ်တံရ။
“သၞာံဏံ တၟေၚ်တၟေၚ်တၟဟ်တၟဟ် ဗ္ၜိုတ်ဂွံတိတ်အောန်ကၠုၚ်ဂှ် ဟိုတ်နူဒးဒုၚ်ဘဲဒဏ် လဗိုတ်ကျာ ဂၠိုၚ်ဂၠိုၚ်ကဵုဝါကီု၊ တုဲပၠန် အခိၚ်မုဟ်ကျာ ကတဴကတာန်လောန်တုဲ ဗ္ၜိုတ်တိတ်အောန်ဏောၚ်” သာ်ဝွံ ညးယိုက်ဂၠေၚ်မံၚ် တာလျိုၚ် ပ္ဍဲကၠအ်ဗ္ၜိုတ် အလဵုအသဳ ကွာန်ကြုၚ်ဖာ်၊ ပွိုၚ်ဍုၚ်မုဟ်ဍုၚ် မွဲတၠ ဟီုရ။
အတိုၚ်လဟီုညးမ္ဂး ပ္ဍဲအခိၚ်ဗတမ် ဥတုမုဟ်ကျာ ဂမ္တဴ မၞုံနူ (၁၈) စဵု (၂၀) ဒဳဂရဳ ဇြေန်ဒဳဂရိတ်မ္ဂး ဗ္ၜိုတ်တိတ်ခိုဟ်ကီုလေဝ် လၟုဟ်အခိၚ်ဗတမ်ဂှ် ဂမ္တဴမၞုံမံၚ် စဵုကဵု (၂၅) ဒဳဂရဳ ဇြေန်ဒဳဂရိတ်တုဲ ဗ္ၜိုတ်တိတ်အောန်ကၠုၚ်ရောၚ် ညးဟီုရ။
“သၞာံအာတေံ တၞံဗ္ၜိုတ် ၜိုတ် ၄၀၀ တှေ် ကွာတ်ဂွံမံၚ်ဗ္ၜိုတ် ၜိုတ် ၃၅ ပံၚ် ဇၟာပ်ဇၟာပ်တ္ၚဲ။ သၞာံဏံဂှ် ဂွံဆ ၂၀ ညိဓဝ်။ ဟိုတ်နူရာသဳဥတုရဏောၚ် အဲထေၚ်” သာ်ဝွံ တၠကၠအ်ဗ္ၜိုတ်မွဲတၠ နူကွာန်ကြုၚ်ဖာ်၊ ပွိုၚ်ဍုၚ်မုဟ်ဍုၚ်ဂှ် ဟီုရ။
ၜိုန်ရဗ္ၜိုတ်တိတ်အောန်မံၚ်ကီုလေဝ် ၚုဟ်ဗ္ၜိုတ်ဂှ် နွံမံၚ်အတိုၚ်သၞာံအာတေံရောၚ်ဂှ်လေဝ် ညးဆက်ဟီုရ။
အလုံကၟိန်ဍုၚ်ဗၟာမွဲမ္ဂး ဒေသတဵုဗ္ၜိုတ် ဂၠိုၚ်အိုတ်ဂှ် မဒှ်တွဵုရးမန်တုဲ တိတဵုဗ္ၜိုတ် မၞုံ (၅၀ဝဝဝဝ) ဨကရ။ အပ္ဍဲတွဵုရးမန် ၁၀ ပွိုၚ်ဍုၚ်မ္ဂး ပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်မုဟ်ဍုၚ်တံဂှ် ဒှ်ပွိုၚ်ဍုၚ်တဵုဗ္ၜိုတ်ဂၠိုၚ်အိုတ်၊ ဗ္ၜိုတ်တိတ်ဂၠိုၚ်အိုတ်ရ။
ပွိုၚ်ဍုၚ်မုဟ်ဍုၚ်ဂှ် တဵုလဝ်ဗ္ၜိုတ် မၞုံ (၅၀ဝဝဝ) ဨကတုဲ ဗ္ၜိုတ်ကွာတ်ဂွံတံဂှ် မၞုံ (၃၃၀ဝဝ) ဨကရောၚ်ဂှ် ဂွံတီကေတ် နူညးယိုက်ဂၠေၚ်မံၚ် တာလျိုၚ် ပ္ဍဲကၠအ်ဗ္ၜိုတ် အလဵုအသဳ ကွာန်ကြုၚ်ဖာ်၊ ပွိုၚ်ဍုၚ်မုဟ် ဍုၚ်ဂှ်ရ။