ဌာန်ပရိုၚ်ဗၠးၜးမန် – ဖျာဇၞော်ဍုၚ်ဇြပ်ဗု တူအာပၟတ်ဂှ် ဟိုတ်နူဇုက်ပၟတ်ယှတ် တူအာဟွံသေၚ်တုဲ မဒးတူအာ ဟိုတ်နူပၟတ်ကၠတ်စံၚ်ရောၚ်ဂှ် တၠဆေၚ်ဖျာတံ ဟီုအိုတ်ရ။
“ဟိုတ်နူဇုက်ပၟတ်ယှတ်တုဲ ပၟတ်တူအာ ဟွံသေၚ်ပုဟ်ဂှ် သီုညးဖအိုတ် ဒုၚ်လဝ်တဲရ။ ပၟတ်ကၠတ်စံၚ်ဏောၚ် ဟီုမံၚ်သီုဖအိုတ်ရ။ ပၟတ်ကၠတ်စံၚ်ဏံဂှ် ကၠုၚ်နူအစဳအဇန် ညးဂှ်ရော ထေက်ကဵုဒးတီဏောၚ်” သာ်ဝွံ တၠဆေၚ်ဖျာမွဲတၠ ဟီုရ။
စပ်ကဵုပၟတ်တူဏံတုဲ သွက်သ္ဂောံဒုၚ်စဳရေၚ်ကဵု သကိုပ်ဝန်ဇၞော်တွဵုရးမန် အပ္ဍဲဂိတုဖေဖဝ်ဝါရဳ ၁ မာန်ဂှ် ကမ္မတဳဂၠိုက်ဂၠာဲစၟဳစၟတ် မဒက်ပ္တန်လဝ်တၟိတံ ဗက်ပကောံပကေဝ်ဒၟံၚ် တၚ်နၚ်အိုတ်ရ။
ပ္ဍဲကမ္မတဳ ဒက်ပ္တန်လဝ်တၟိဏံဂှ် ဂကောံကမ္မတဳဖျာ၊ ဂကောံဒပ်ဗၠာဲသၟိၚ်၊ ဂကောံဒပ်ပရိုၚ်ဗၠာဲသၟိၚ် SB ကေုာံ ဂကောံစၟဳစၟတ်ဂၠိုက်ဂၠာဲတၟေၚ် (စ စ စ) တံ ပါလုပ်တုဲ ကောန်ဂကောံဌာနပရေၚ်ဖောအ်ဗြေဝ် (စည်ပၚ်) တံ အခေါၚ်ပါလုပ် ဟွံမွဲရောၚ် ဂွံတီကေတ်ရ။
ပ္ဍဲဂကောံကမ္မတဳစၟဳစၟတ်ဂၠိုက်ဂၠာဲကၠာတေံဂှ် ဌာနဓါတ်လလဳ၊ ဌာနကောပ်ကာဲပရေၚ်စက်၊ ဌာနပရေၚ်ဖောအ်ဗြေဝ် ကေုာံ ဌာနအုပ်ဓုပ်တံ ပါလုပ်အိုတ်ရ။
ဟိုတ်နူပၟတ်တူဏံတုဲ ရပ်ထိၚ်လဝ် ညး ၆ တၠ မပါလုပ်သီုက္ဍိုပ်ဖျာ ဥူသဵုတိၚ် အပ္ဍဲဗဒိုပ်ဗၠာဲသၟိၚ် ဍုၚ်ဇြပ်ဗုရောၚ် ဂွံတီကေတ်ရ။
“သွက်ဂွံသ္ပဒတန် ပရေၚ်ဒဒှ်ပၟတ်တူဏံ ချိုတ်ချိုတ်ပၠိုတ်ပၠိုတ်မာန်ဂှ် ပိုဲကဵု ဝန်ဇၞော်အလဵုအသဳတွဵုရးတံ ဂစာန်ဒၟံၚ်ဖိုဟ်ရ။ လၟုဟ်ပံက်လဝ်ဖျာယာယဳ အပ္ဍဲကၠအ်ပ္ကဴ။ သွက်ဂွံသိုၚ်ဗဒမ်ဖျာဂှ် ဒးကဵုမွဲဗဒမ် ပိဠက်ဒကေဝ်” သာ်ဝွံ ညးစၞးကၠတ်ထဝ်တွဵုရးမန် နူဒေသဆန္ဒမာဲ စၟတ် (၂) နာဲနာၚ်ဥူ ဟီုရ။
ဖျာဇၞော်ဇြပ်ဗုဝွံ နူအခိၚ်သ္ဂာဗတမ် ဂျာန္နဝါရဳ ၁၈ စဵုကဵု ၁၉ အခိၚ်ဖလာၚ်ယး ပၟတ်တူအာဂှ်ရ သှေ်ဆဗွဝ်ဗတေၚ်ဟေၚ်တုဲ ဆောံလေၚ်အာၚုဟ်မး ဂၠိၚ်ကဵုလၟိဟ်ပြကောဋိကိုဋ်ဒကေဝ်ရ။
ဟိုတ်နူပၟတ်ဏံတုဲ ဆေၚ်သွံကပေါတ်ပၟတ်ဓါတ်လလဳ ၂၇ ဆေၚ်၊ ဆေၚ်ထဝ် ၉၅ ဆေၚ်၊ ဆေၚ်သွံကပေါတ်နာနာ ၄၁ ဆေၚ်၊ ဆေၚ်သွံဂၠိက်ယာတ် ၂၁၅ ဆေၚ် ကေုာံ ဆေၚ်သွံကပေါတ်တၞဟ်တၞဟ် သီုဖအိုတ်ၜိုတ် ၆၀၀ ဆေၚ် ဆောံလေၚ်ပါအာပၟတ်အိုတ်ရ။