ပ္ဍဲဂိတုဂျူလာဲ စၟတ်တ္ရဲ ၂၃ဂှ် ပ္ဍဲထံၚ်အၚ်စိၚ်ဂှ် နူကဵုဒပ်ပၞာန်သီုအဝဵုတအ်မွဲကဆံၚ် ဖျေံထောံလဝ်ဒန်ဂစိုတ် ကောန်ထံၚ်သၟာပရေၚ်ဍုၚ်ကွာန် ဥုဖျိုဝ်ဇြေယာတဝ်၊ ဥုကိုဝ်ဂျေန်မီ၊ ဥုလှမျိုဝ်အံၚ်၊ ဥုအံၚ်သူရဇြဝ်တအ် ပန်တၠဂှ်တုဲ တ္ရဲလကြဴဏံ ဂျူလာဲ ၂၆ ဏံဂှ်ပၠန် ကောန်ထံၚ်သၟာပရေၚ်ဍုၚ်ကွာန် ၃ တၠ ဒးဒုၚ်ထပ်ဖျေံစဳဳရေၚ်ထောံပၠန်ဂးတုဲ ပရိုၚ်ဂှ်မံက်ပြးတိတ်ကၠုၚ်မံၚ် အကြာညးဍုၚ်ကွာန်တအ်ရ။
ပရိုၚ်ဂှ် ပြးတိတ်အာတုဲ ညးဍုၚ်ကွာန်တအ် ဒှ်ကၠုၚ်ဓဝိၚ်လ္တူပရိုၚ်ဂှ်အိုတ်ရ။ အခိၚ်အခါအကြာဒှ်ဒၟံၚ်ဓဝိၚ်ဏံဂှ်ရ “ညးတၠရမျာၚ် စောဖိုးခွာဂှ်လေဝ် ပ္ဍဲအရာဒးဒုၚ်စဳရေၚ်ဖျေံထောံဒန်ဂစိုတ်ဏံဂှ် ညးလေဝ်ပါအာအဖဝ်ဂှ်ကီု” ဂးတုဲ ပ္ဍဲဂိတုဂျူလာဲ စၟတ်တ္ရဲ ၂၇ဂှ် ပရိုၚ်ဂှ်မံက်ပြးတိတ်ကၠုၚ်ရ။ ပရိုၚ်ဂှ် “မန္တလာမြေသတၚ်းစုံ” ကဵု “ချောၚ်းဦးသတၚ်းစုံ”တအ်မွဲကဆံၚ် ပတိုန်ထ္ၜးလဝ်တုဲ မၞိဟ်ကဵုလဝ် like ၜိုတ် (၁၆၀၀၀) ပြၚ်ကၠုၚ်တုဲ မၞိဟ်ကလေၚ်ပါ်ပရအ်တအ်လေဝ် လၟိဟ်ဗွဲမဂၠိုၚ်ဒှ်ကၠုၚ်ရ။
စပ်ကဵုပရိုၚ်ဏံတုဲ နူကဵုဂကောံစၟဳစၟတ်ပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ဒှ်မံၚ်ပရိုၚ်ပတောံမွဲဏောၚ်ဂှ်တီကၠးမံၚ်ရ။ မုဟိုတ်ရောဟီုတှေ်တုဲကၠုၚ်ဂိတုဖေဖဝ်ဝါရဳ၊ စၟတ်တ္ရဲ ၁၊ သၞာံ၂၀၂၁ဂှ် စပ္တံနူပၞာန်သီုထောံအဝဵုဂှ်တုဲ ညးဒးဒုၚ်ရပ်စုတ်ထောံထံၚ် နကဵုဒုဟ်ဒန် “ပုဒ်မ ၅၀၅-က”ဂှ် ဗၞတ်ပွိုၚ် ၃ သၞာံ ကဵုဒန်ထံၚ် သီုကမၠောန်ဂှ် ဂွံတီကေတ်ကီုရ။ အဖဝ်ညးဂှ်လေဝ် အနုသုခမဒယှ်တှ်ဗွဲမဂၠိုၚ် ဒးအာထံၚ်ဒုဟ်ဒန် ပွိုၚ် ၃ သၞာံ ဗီုညးကီုဂှ်လေဝ် နူကဵုမဳဒဳယာ “VOA Burmese” ဂှ်မွဲကဆံၚ် ကေၚ်ပတိုန်ထ္ၜးလဝ်နွံရ။
ညးတၠရမျာၚ်ဒယှေ်ဒွက် “သဝ်ဖိုဝ်ခွာ”ဂှ် ဒးဒုၚ်ဖျေံဒန်ဂစိုတ်ဟွံသေၚ်တုဲ ညးဒးဒုၚ်ဖျေံလဝ်ဒန်ထံၚ်သီုကဵုကမၠောန် ပွိုၚ် ၃ သၞာံဟေၚ်တုဲ ပရိုၚ်မံက်ပြးတိတ်ကၠုၚ်မံၚ်လၟုဟ်ဏံဂှ် ဒှ်မံၚ်ပရိုၚ်ပတောံမွဲဂှ် မိက်ဂွံကဵုဏာသ္တီကီုရ။ ညးတၠရမျာၚ် “စောဖိုးခွာ”ဝွံ ဒှ်ညးဒယှေ်စဒွက် လ္ပာ်ပရေၚ်ဓရ်ၜိုဟ်လလီုဂၠိုၚ်မံၚ်ဏောၚ်ဂှ်လေဝ် ဂွံတီကေတ်ရ။
အခိၚ်အခါကာလၟုဟ်ဂှ် ညးဍုၚ်ကွာန်တအ် အဃောဒှ်မံၚ်ဓဝိၚ်ဗီုဗီုဇဏံဂှ် ရဲကၠောန်ဗဒှ်ပရိုၚ်ပတောံတအ်လေဝ် ပရိုၚ်ဍေံတအ်ချူပတောံလဝ်တအ်ဂှ်လေဝ် ညံၚ်ဂွံကိတ်ညဳကဵုဗွဲမဂတာပ်အခိၚ်ဂှ် ဍေံတအ်ဖန်ဇန်ကၠောန်ဗဒှ်စလေပ်ရ။ ဟိုတ်ဒှ်သာ်ဂှ်ရ ညးမဗှ်မံၚ်လိက်ပရိုၚ်တအ်လေဝ် ဆဵုတမ်ရိုဟ်ပရိုၚ်မွဲမွဲမ္ဂး ညံၚ်ဟွံဂွံပတှေ်ဒးအာပြဟ်ဂှ် ဒးစွံသတိထေက်ရ။ တုဲပၠန် ယဝ်ခါရ ဟွံတီကၠးလ္တူတၚ်နၚ်ပရိုၚ်မွဲမွဲမ္ဂး ဗက်ဂၠာဲအာသၟာရံၚ် နူChat Box ဌာနပရိုၚ်လုပ်ကဵုသၞောဝ်တအ်ညိဂှ်လေဝ် မိက်ဂွံဖတိုက်ဖ္အောဝ်ဏာကဵုကီုရ။
Reference >>တွေးပြီးမှယုံ-Think Before You Trust