ပ္ဍဲကဵုဂိတုဂျူလာဲ စၟတ်တ္ရဲ ၂၁ဂှ် ပ္ဍဲကဵုဍုၚ်ကြုက်ဂှ် ဗြဲဂူဍာ်ဗၠိုက်ဇၞော်မံၚ်ဂးတုဲ ဗီုရုပ်မွဲဗီုဂှ် မံက်ပြးတိတ်ကၠုၚ်မံၚ်အကြာညးသုၚ်စောဲ social mediaတအ်ရ။ Postဏံဂှ် နူကဵုအကံက် “Phone Ngal”ဂှ်မွဲကဆံၚ် ပါ်တြးပတိတ်လဝ်တုဲ ပ္ဍဲကဵဵု post ဂှ်တှေ် “ ဂိတုဂျူလာဲ၊ စၟတ်တ္ရဲ ၂၁ ပ္ဍဲကဵုချီးနားဂှ်” သာ်ဝွံ ညးတေံပတိုန်လဝ်ကဵုဗီုဂှ်သာ်ဂှ်တုဲ ညးမွဲကဵုမွဲကလေၚ်ပါ်ပရအ်မံၚ်ညးသ္ကအ်ဂှ် ဂွံဆဵုကေတ်ရ။ ဗီုဏံဂှ် ဒှ်မံၚ်ဗီုတြေံတြေံ နူသၞာံ ၂၀၂၁တေံဟေၚ်ရ။

ဗီုပတိုန်လဝ်ဏံဂှ် နူကဵုဂကောံစၟဳစၟတ်ပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ဒှ်မံၚ်ဗီုနူသၞာံတုဲတုဲတေံမွဲဂှ် ပိုဲစၟတ်သ္တီလဝ်ရ။ စပ်ကဵုဗီုဏံတုဲ ဂၠိုက်ဂၠာဲရံၚ်လိက်ဒၞာဲကိစ္စဇၞော်ဂှ် ပ္ဍဲကဵဵု google ဂှ်တုဲ ပ္ဍဲကဵုဂိတုဂျူလာဲဂှ် ပ္ဍဲဍုၚ်ကြုက်တေံ ရာသဳဖံက်ပၠန်တုဲ ဗြဲဂူဍာ်ဗၠိုက်လဝ်ဂှ်နွံရ။ ဆဂးစပ်ကဵုဗီု ပတိုန်ထ္ၜးပါ်ပရအ်မံၚ် အကြာညးသုၚ်စောဲ Social Media တအ်ဏံဂှ် ဒှ်မံၚ်ဗီုအဃောဍာ်ဗၠိုက်လဝ် ပ္ဍဲတွဵုရးဟိုၚ်နာန်(Henan)၊ ဍုၚ်ဇြာန်ချိုဝ်(Zhengzhou)  ကၟိန်ဍုၚ်ကြုက်ဂှ် အခိၚ်နူသၞာံ ၂၀၂၁ တေံဟေၚ်ရ။ ဗီုဏံဂှ် နူဌာနပရိုၚ် “CNGD”အလဵုအသဳကၟိန်ဍုၚ်ကြုက်တအ်လေဝ် ထမံက်ထ္ၜးလဝ်နွံရ။

ပ္ဍဲသၞာံဏံဝွံ ပ္ဍဲကၟိန်ဍုၚ်ကြုက်တအ်ဂှ် ဟိုတ်နူကဵုရာသဳဖံက်ပၠန်တုဲ ဗြဲဂူဍာ်ဗၠိုက်လဝ်နွံမံၚ်ကီုလေဝ် စပ်ကဵဵုဗီုပြးပတိတ်မံၚ်ဏံဂှ် ဒှ်မံၚ်ဗီုတြေံတြေံ ဗီုနူသၞာံ ၂၀၂၁တေံဟေၚ်ရ။ ဟိုတ်ဂှ်ရ ဗီုဏံဂှ် ဒှ်မံၚ်ဗီုသၞာံတုဲတုဲကၠုၚ်တေံမွဲတုဲ ဗီုတြးပတိတ်လဝ်ဏံဂှ် ဒှ်မံၚ်ဗီုပတောံမွဲဂှ် ပိုဲဂွံစၟတ်သတီလဝ်ကီုရ။

ပုရိသာတ်ညးမသုၚ်စောဲမံၚ် Social Mediaတအ်လေဝ် ဆဵုတမ်ရိုဟ်ပရိုၚ်မွဲမွဲကဵုဒှ် ဗီုတောဲပတိုန်လဝ်ကဵုလိက်ပရိုၚ်တအ်ဂှ်ကီုကဵုဒှ် ကာလပိုဲတအ်ဆဵုမ္ဂး လ္ပပတှေ်စှေ်စိုတ်ပြဟ်ဏီညိ။ တုဲပၠန် ယဝ်ခါရပိုဲတအ် ဒှ်မံၚ်သံသယ လ္တူပရိုၚ်မွဲမွဲကီု၊ လ္တူဗီုမွဲမွဲကဵုဒှ် ညံၚ်ပိုဲတအ်ဂွံတီကၠးမာန်ဂှ် ပိုဲတအ်ဗက်ဂၠိုက်ဂၠာဲစၟဳစၟတ်ရံၚ် နူဌာနပရိုၚ်တအ်ချိုတ်တ်ဗၠိုတ်တ်တုဲမှ ပတှေ်စှေ်စိုတ်ပါ်ပရအ်ညိဂှ် မိက်ဂွံဗတိုက်ဖ္အောဝ်ဏာကီုရ။