ပ္ဍဲတွဵုရးဍုၚ်မန်ဝွံ အခိၚ်ရာသဳဒူရေန်စမံက်ဂှ် ဂွံၚုဟ်ခိုဟ်ကီုလေဝ် ဟိုတ်နူသတ်တိတ်အောန်ကီု၊ စရိတ်ပလံၚ်ဗ္စိုပ်သၠုၚ်မံၚ်ဂှ်ရ ဂွံပရဲအောန်ရဂှ် ဒေၚ်ရာန်သတ်ဆု နူဍုၚ်ရေဝ် ဟီုရ။
ပ္ဍဲအခိၚ်ဒူရေန်စဍုဟ်အလန်ပထမ ဂိတုအေဗရဴ၊ မေ ဂှ်ဝွံ ၚုဟ်မးဒူရေန်ဂကူအပြောံ တိတ်နူဒေသ နူ (၄၀၀၀၀) စဵုကဵု (၂၀၀၀၀၀) ဒကေဝ်နွံမံၚ်တုဲ ၚုဟ်မဆက်မတ် မွဲကဳလိုဝ် (၂၄၀၀၀) ဒကေဝ်နွံရောၚ် ဂွံတီကေတ်ရ။
ၜိုန်ဂှ်ကီုလေဝ် ဟိုတ်နူစရိတ်ပလံၚ်ဗ္စိုပ် နူရေဝ် – မတ်မလီု ၚုဟ်သၠုၚ်တိုန်မံၚ်ဂှ်ရ ဂွံပရဲအောန်မံၚ်ရဂှ်လေဝ် ဒေၚ်ရာန် “ညးဗြဴ” နူပွိုၚ်ဍုၚ်ရေဝ်မွဲတၠ ဟီုရ။
“ဂွံၚုဟ်ခိုဟ်ကီုလေဝ် စရိတ်ပလံၚ်ဂှ် က္ဍၚ်မံၚ်ဏောၚ်။ နူကဵုရေဝ် ပလံၚ်မတ်မလီု ဒူရေန် (၃၀၀) မပြၚ် မွဲအလန်တှေ် စရိတ်ကာသက်သက်ဂှ် (၄၊ ၅) ကိုဋ်ပြၚ်မံၚ်။ ရာန်ကၠေၚ်ဝါတ်ပၠန်တှေ်” သာ်ဝွံ ညးတၠကၠအ်ဒူရေန် နူပွိုၚ်ဍုၚ်ရေဝ်မွဲတၠ ဟီုရ။
သၟာၚ်နူဂှ်ပၠန် ဟိုတ်နူဂမ္တဴသ္ကာတ်မြဟ် ကေုာံ ဝါတ်ဂါတ်ကၠေၚ်တုဲ ကဵုဍာ်ကုတၞံဒူရေန် လၟေၚ်ဍာံဟွံမာန်ဂှ်ရ သတ်ဒူရေန်ၜတ်ၜတ်ဂမၠိုၚ်ဂှ် လီုလာ်အာတုဲ ပ္ဍဲသၞာံဏံ သတ်ဒူရေန်တိတ်အောန်မာန်ရောၚ် ညးဗြဴဂှ် ဟီုရ။
အခိၚ်ရာသဳဒူရေန်စမံက်ဏံ သတ်ဒူရေန်မန်/ကရေၚ် စိုပ်ကၠုၚ်အပ္ဍဲဗွဝ်ဖျာမန်ဂှ် မၞိဟ်ဒးစိုတ်ဂၠိုၚ် ကေုာံ သွံခိုဟ်အိုတ်တုဲ ပ္ဍဲကဵုဗွဝ်ဖျာလေဝ် နွံပၟိက်ဒၟံၚ်ရ။
ညးတၠကၠအ်ဒူရေန်နူရေဝ်မွဲတၠဂှ် “သွံရာန်ဂှ်တှေ် ခိုဟ်မံၚ်ရ။ ၜိုတ်ပိုဲပလံၚ်ဏာ သီုဖအိုတ်ဂှ် လ္ပာ်ဒေၚ်တံ အကာဲအရာဒုၚ်မံၚ်တဲနွံရ။ ညးရာန်စဂှ်လေဝ် ဂၠိုၚ်မံၚ်ရ။ ပ္ဍဲကဵုမန်ဂှ်တှေ် ညးရာန်စသတ်ဒူရေန်အရိုၚ် ဂၠိုၚ်နူကဵုမဆက်မတ်ကီုရ” သာ်ဝွံ ညးဟီုရ။
ပ္ဍဲတွဵုရးဍုၚ်မန်ဝွံ ပါ်ခြာတဵုတၞံဒူရေန် မဆက်မတ်သေံ ကေုာံ မဓမ္မတာနွံတုဲ သၟာၚ်နူဗွဝ်ဖျာအပ္ဍဲဒေသမ္ဂး ပလံၚ်ဗ္စိုပ်သွံဒၟံၚ် ရးလ္ဂုၚ်၊ အဝ ကေုာံ နေပျဳဒဝ်နွံရ။
အခိၚ်ရာသဳဒူရေန်ဝွံ နူဂိတုဂျောန် စဵုကဵုဂိတုအဝ်ဂေတ်အိုတ်ဂှ် တိတ်ဂၠိုၚ်တုဲ ပ္ဍဲသၞာံတုဲကၠုၚ်ဏံ ဟိုတ်နူဗြဲဂူပြဟ်ကီုလေဝ် သတ်ဒူရေန်တိတ်အတိုၚ်ဓမ္မတာရဂှ် ညးတၠကၠအ်ဒူရေန်တံ ဟီုဂးလဝ်ဂှ် ဂွံတီကေတ်ရ။
