ညးစၞးကၠတ်ထဝ်လ္ၚဵု တွဵုရးဍုၚ်မန် နူဗော်ညဳသၟဟ်မန် (MUP) ဝွံ နကဵုညးဍုၚ်ကွာန်တံ မဒးဆဵုဂဗဒၟံၚ် တၚ်ခက်ခုဲပြဒ္ဒညာဂမၠိုၚ် ကေုာံ တၚ်မနွံပၟိက်ဒေသဂမၠိုၚ် ကၠုၚ်စိုပ်ပ္တိုန်ထ္ၜးညိဂှ် ကော်ဘိက်ဒၟံၚ်နွံရ။ မွဲအဆက်ဓဝ်သွက်သ္ဂောံကလၚ်ရမျာၚ်ညးဍုၚ်ကွာန်ကြပ်ကြပ်မာန်ဂှ် ပံက်လဝ်ခဒံရုၚ်ညးစၞးကၠတ်ထဝ် ပ္ဍဲရုၚ်ဗော်ပွိုၚ်ဍုၚ်တံတုဲ တၚ်နွံပၟိက် ညးဍုၚ်ကွာန် ကေုာံ တၚ်ခက်ခုဲပြဒ္ဒညာဂမၠိုၚ်ဂှ် ကၠောန်သ္ပရေၚ်တၠုၚ် ပသောၚ်ကဵုဗွဲမပြဟ်တုဲ မွဲကရောံကဵုညးဍုၚ်ကွာန်တံဂှ် ကၠောန်သ္ပရေၚ်တၠုၚ်သၠုၚ်ပ္တိုန်အာ ပရေၚ်တောတက်ဖောအ်ဗြေဝ်ဒေသရောၚ် ညးစၞးကၠတ်ထဝ် ဗော်ညဳသၟဟ်မန် MUP တံ လလောၚ်ပ္တိတ်လဝ်ရ။
တၚ်ကော်ဘိက် ညးစၞးကၠတ်ထဝ် နူဗော်ညဳသၟဟ်မန် MUP ဝွံ ယဝ်ရံၚ်အာဗွဲဓမ္မတာမ္ဂး ဒှ်လဂံါ ပရေၚ်စုက်လုက် ဆက်ဆောံ အကြာဗော်ကဵု ညးဍုၚ်ကွာန်တံရောၚ် ထေၚ်ကေတ်မာန်ရ။ ၜိုန်ဂှ်ကီုလေဝ် ပ္ဍဲကဵုအကာဲအရာပကတိ ပရေၚ်ဍုၚ်ကွာန် အခိၚ်လၟုဟ်ဏံမ္ဂး တၚ်ကော်ဘိက်ဏံဂှ် ရှ်သာဟွံမွဲမွဲသာ် ဒှ်အရာထ္ၜးအယောၚ်အလာ ပရေၚ်ဍုၚ်ကွာန်သက်သက်ဟေၚ်တုဲ သွက်ဂွံ ဓမံက်ပ္တိတ် သၞောတ်ဒဳမဝ်ကရေဇြဳ ဇေတ်ဇေတ်မာန်ဂှ် နူဗော်ညဳသၟဟ်မန် (MUP) သွက်ဂွံပါ်ပဲါထံက်ထ္ၜးဂှ် နွံပၟိက်ဒၟံၚ်ဣရ။
ဗော်ပရေၚ်ဍုၚ်ကွာန်မွဲမွဲဝွံ သွက်ဂွံဓမံက်ဆန္ဒညးဍုၚ်ကွာန်ဂှ် ဒှ်တာလျိုၚ်အဓိကကီုလေဝ် ဗော်အပ္ဍဲဒေသ အခိၚ်တ္ၚဲဏံတံဂှ် ဟွံသၠုၚ်နူအဆံၚ်ဒးဒုၚ်စကာဗဗွဲဓဝ် သွက်ကမ္မယှေန်ပၞာန် (အလဵုအသဳဒုၚ်ယၟုညးဍုၚ်ကွာန်) တံရ။ ပ္ဍဲကဵုသၞောတ်အာဏာစက်ပၞာန် ရပ်ထိၚ်လဝ်နာနာဏံဝွံ နကဵုညးစၞးဗော်ဂမၠိုၚ်တံ ကလၚ်ရမျာၚ်ညးဍုၚ်ကွာန်တုဲ ၜိုတ်လဵု၊ ဗီုလဵု ကၠောန်သ္ပကဵုမာန်ရော။ အခိၚ်ဒပ်ပၞာန်တံ ရပ်ထိၚ်လဝ် ဘဏ္ဍာ (ဗာတ်ဂျိတ်)၊ ပရေၚ်ဂီုကၠီု ကေုာံ မူဝါဒသီုဖအိုတ်ဏံဂှ် အခန်ကဏ္ဍဗော်တံ ၜိုတ်အဆံၚ်ဘိုၚ်ရီုဗၚ် သွက်စက်ယန်ပရေၚ်အုပ်ဓုပ်ပၞာန် ဂွံဂေတ်မာန်ဟေၚ်နွံရ။
ညးဍုၚ်ကွာန်တံဝွံ ဒးဒုၚ်စသိုၚ်ဒၟံၚ် ဘဲပၞာန်၊ ဘဲဒးယိုက်ဂၠေၚ်ပၞာန်၊ ၚုဟ်မးဖျာက္ဍၚ် ကေုာံ ဘဲဒဏ်ပရေၚ်ဂီုကၠီုဟွံမွဲအိုတ်ဂှ်တုဲ ညးတၠဒုဟ်ဖန်ဗဒှ် ဒဒိုခ်တဏံသီုဖအိုတ်ဂှ် ဒှ်သၞောတ်တၠအဝဵုပၞာန်ကီုလေဝ် နကဵုညးစၞးဗော်တံ သွက်ဂွံဟီုဂးပါ်ပဲါတၚ်ဏံဂှ် သတ္တိဟွံမွဲရ။ နကဵုဗော် မိက်ဂွံဂွံဒၞာဲ သၟဝ်သ္ကေံတဲဒပ်ပၞာန်တံဂှ်မ္ဂး ဒတူလိုၚ်လ္ပာ်ညးဍုၚ်ကွာန်တုဲ စိုတ်ဓာတ်ဗ္တိုက်သရိုဟ် သၞောတ်တၠအဝဵုပၞာန်ဂှ် ဟွံမွဲရ။
ဂုဏ်သိက္ခာဂကောံပရေၚ်ဍုၚ်ကွာန်မွဲမွဲဂှ်ဝွံ ဟွံဒးကၠောန်သ္ပရေၚ်တၠုၚ် နူဒပ်ပၞာန်ဖျေံစၟတ်လဝ်ဂှ်မွဲသာ် တန်တဴဒၟံၚ် ၜိုတ်လဵုထိၚ်ဒဝ် အဝဵုအာဏာစက် ဖန်ဗဒှ်ဒၟံၚ် ဒဒိုခ်ညးဍုၚ်ကွာန်တံဂှ်ရ။ ဂကောံဗော်ပရေၚ်ဍုၚ်ကွာန်မွဲမွဲ မိက်ဂွံဂွံဓဝ်ပတှေ်ညးဍုၚ်ကွာန်မ္ဂး အခိၚ်လၟုဟ်ဏံ ပွမရပ်မံၚ်သၟတ်ဗွဲအဓမ္မ ပ္ဍဲတွဵုရးဍုၚ်မန်၊ ဇၟာပ်တ္ၚဲ ပန်ထောံဖျေံဗမ် ကုညးဍုၚ်ကွာန် ပ္ဍဲတွဵုရးဍုၚ်မန်၊ သီကေတ်ဒၟံၚ် ဒြပ်ရတ် ကေုာံ တိ ညးဍုၚ်ကွာန်တံ ဗွဲအဓမ္မ၊ ပွမပံက်ဒၟံၚ် ဝိုၚ်ဝေၚ်္ၚေၚ်လံၚ်သြန်သၠဲသၠဲလးလး ပ္ဍဲတွဵုရးဍုၚ်မန်ဂှ် နကဵုဗော်ဒဒဵုဒစးတံ ဒးဂံၚ်ဟီုတုဲ ဒုၚ်စသိုၚ်မွဲကရောံကဵုညးဍုၚ်ကွာန်၊ ဒးဂံၚ်လုပ်ပေဲါဗ္တိုက်မွဲကရောံကဵု ညးဍုၚ်ကွာန်တံရ။ ယဝ်ပံၚ်တောဲဒၟံၚ်ကဵုဒပ်ပၞာန်မ္ဂး ဒးသ္ၚောဲခြာဒၟံၚ်ကဵု ဓဝ်ပတှေ်ညးဍုၚ်ကွာန်တံဏီရ။
အခိၚ်ကလၚ်ဒၟံၚ်စၞောန် တၠအဝဵုပၞာန်ဏံ ကလၚ်ရမျာၚ်ညးဍုၚ်ကွာန်တံဟီုဂှ် ထပ်လီစၞာဲမံၚ် ညးဍုၚ်ကွာန်တံဟေၚ်ရ။ တ္ၚဲဏံ ညးဍုၚ်ကွာန်မန်တံ မနွံပၟိက်ဒၟံၚ်ဂှ် သွက်ဂွံကလၚ်ဒဒိုခ်ညးတံသက်သက် ဟွံသေၚ်မွဲသာ် ဟီုဂးထံက်ထ္ၜးတမ်ရိုဟ်ဒဒိုခ်ဂှ်တုဲ ဒးဒှ်က္ဍိုပ်သ္ကိုပ်ဂံၚ်လုပ်ပေဲါဗ္တိုက် သွက်ညးဍုၚ်ကွာန်တံရ။ ဂကောံဗဒဗဒဲါသၟဝ်ဒပ်ပၞာန်တုဲ ဂၠာဲဒၟံၚ်ပရေၚ်ပိုန်ဒြပ် သွက်ပူဂဵုတံဂှ် ကလိဂွံဓဝ်ပတှေ် နူညးဍုၚ်ကွာန်တံ ဟွံသေၚ်ရောၚ်ဂှ် ကဵုသတိပ္တိုန်ထ္ၜးဏာရ။
