သၞာံဗ္တောန်ပညာဏံဝွံ ပ္ဍဲဂိတုဂျောန် (၁) တေံ စပံက်အာရောၚ်တုဲ ဘာကောန်ဂကူမန်သိုၚ်တၟိ ဟွံအောန်နူ (၄) ဘာ သွက်ဂွံပံက်အာနွံရောၚ် အတိုၚ်ခၟဳသၚ် ကေုာံ ညးဒေသတံ ဟီုလဝ်ဂှ် ဂွံတီကေတ်ရ။
အတိုၚ်ဌာန်ပရိုၚ်ဗၠးၜးမန် IMNA သၟာန်သၟုက်လဝ်ဂှ်မ္ဂး ပ္ဍဲပွိုၚ်ဍုၚ်မုဟ်ဍုၚ်ဂှ် ဘာတန်မူလ (၂) ဘာ၊ ပ္ဍဲရေဝ်သၟဝ်ကျာ ဘာတန်မူလ (၁) ဘာ၊ ပ္ဍဲပွိုၚ်ဍုၚ်ပံၚ် ဘာတန်မူလ (၁) ဘာတံဂှ်ဝွံ သွက်ဂွံပံက်အာဘာ သၟဝ်ဌာနကမ္မတဳပရေၚ်ပညာကောန်ဂကူမန် MNEC နွံရ။
ဘာကောန်ဂကူမန်တၟိ သ္ဂောံပံက်အာလၟုဟ်ဏံဂှ်ဝွံ သွက်ဂွံခါန်ကၞက် အ္စာ၊ အ္စာၝောံဂှ် တၚ်ကော်ဆောနွံမာန်ကီုလေဝ် ဗွဲကိုပ်ကၠာ ကဵုဖျုန်ကုသွက်ဂွံပံက်ဘာကောန်ဂကူမန်မာန်ဂှ်တုဲ ဇြဟတ်အ္စာ၊ အ္စာၝောံ မနွံပၟိက်တံဂှ် ထပ်ဗပေၚ်အာရောၚ် ခၟဳသၚ်ပါလုပ် ပ္ဍဲပရေၚ်သိုၚ်ခၞံဘာ နူရေဝ်မွဲတၠဂှ် ဟီုမြော်လဝ်ရ။
“ပ္ဍဲရေဝ်သၟဝ်ကျာဂှ်တှေ် ကွးဘာ ၜိုတ် (၂၀) ဟေၚ်နွံရ။ ဘာအလဵုအသဳလေဝ်နွံရ။ ဆဂး တၠဂုန်တံဂှ်တှေ် ဆန္ဒမိက်ဂွံဗဒှ် ဘာကောန်ဂကူမန်နွံတှေ် သၞာံဏံ ဒှ်ပံက်ဏောၚ် ရန်တၟံလဝ်ရ။ ဘာကောန်ဂကူမန်ဂှ်တှေ် ဒၞာဲဒေသ ဘာအလဵုအသဳဟွံမွဲဂှ် ကွးဘာအောန်ကီုလေဝ် ညံၚ်ဂွံဒှ်ပံက်ဂှ် ပံက်ဏောၚ်” သာ်ဝွံ ဟီုမြော်လဝ်ရ။
သၟာၚ်နူသိုၚ်လဝ်ဘာတၟိဂှ်မ္ဂး ဘာကောန်ဂကူမန်လ္ၚဵု ဒှ်မံၚ်ခက်ခုဲကဵုဒၞာဲတံဂှ် ထပ်သိုၚ်သၠဲပ္တိတ်ကီု၊ က္လေၚ်ပလေဝ်ပလေတ်ကီု နွံမံၚ်ရောၚ် ဂွံတီကေတ်ရ။
သွက်သၞာံဗ္တောန်ပညာ (၂၀၂၆ – ၂၀၂၇) ဏံဝွံ ပ္ဍဲဘာဌာနပရေၚ်ပညာကောန်ဂကူဂမၠိုၚ်ဂှ်မ္ဂး ပ္ဍဲဂိတုမေသတ္တဟလက္ကရဴအိုတ်ဏံ ဒုၚ်တဲပအပ်ဘာတုဲ သွက်ဂွံပံက်အာ ပ္ဍဲဂိတုဂျောန် (၁) ဂှ် စပလေဝ်လေတ်မံၚ်ရောၚ် အ္စာဘာ နူဌာနပရေၚ်ပညာကောန်ဂကူမန်မွဲတၠ ဟီုရ။
“အ္စာ၊ အ္စာၝောံတံ ညံၚ်ဂွံစိုပ်ဒၞာဲဇကုဂှ် ကၠောန်ကောံဓရီုရ။ ပလေဝ်ခုၚ်လီုတံ၊ ကိစ္စပြံၚ်ဘာတံ၊ ပလေဝ်ပလေတ်ခဒံဘာ၊ သၞာံဂွံပံက်ပြေပြေပြံၚ်ပြံၚ်မာန်ဂှ် ကြပ်ဟွံမွဲရ။ အဆံၚ်ပွိုၚ်ဍုၚ်လေဝ် ဂေတ်မံၚ်ကဵုပြဿနာ ဂၠာဲအ္စာ၊ အ္စာၝောံ ယိုက်ဂၠေၚ်တာလျိုၚ်တံရ။ ကွးဘာကၠုၚ်ပအပ်ဘာတံ စိုပ်မံၚ်ရတုဲ အ္စာ၊ အ္စာၝောံတံ ဟွံမွဲဏီ၊ အေဇှ်ရ ဟွံပြေပြံၚ်ပုဟ်” သာ်ဝွံ ဟီုရ။
ဟိုတ်နူဘဲဒဏ်ၚုဟ်ဖျာက္ဍၚ် ကေုာံ ပြဒ္ဒညာ ပရေၚ်စသုၚ်မံၚ်စံၚ်ဂှ်ရ အ္စာ၊ အ္စာၝောံ မကလိဂွံဒၟံၚ် စရိတ်ထံက်ပၚ်အောန်အောန်တံဝွံ ယိုက်ဂၠေၚ်တာလျိုၚ် ၜိုတ် (၂) သၞာံတုဲဂှ် ညးပ္တိုန်လိက်နုက်တိတ်ဂၠိုၚ်မံၚ်ရောၚ် ညးဆက်ဟီုလဝ်ရ။
သၟဝ်ဌာနပရေၚ်ပညာကောန်ဂကူမန်ဝွံ သၟာၚ်နူဂွံအခေါၚ်အရာ ဗ္တောန်ပညာအဆံၚ်သၠုၚ် စဵုကဵုဍုၚ်သၟာၚ် (ဍုၚ်နာနာ) တုဲ ဟိုတ်နူအကာဲအရာဂီုကၠီုအပ္ဍဲဒေသ ကေုာံ စရိတ်ဗ္တောန်ပညာသက်သာဂှ်ရ ဇၟာပ်သၞာံ လၟိဟ်ကွးဘာဂၠိုၚ်တိုန်ကၠုၚ်ဒၟံၚ်ရောၚ် ဂွံတီကေတ် နူညးတာလျိုၚ် ကမ္မတဳပရေၚ်ပညာကောန်ဂကူမန်တံရ။
အတိုၚ်စရၚ် သၞာံဗ္တောန်ပညာမတုဲတေံမ္ဂး ပ္ဍဲတိဍာ်ဗော်ဍုၚ်မန်တၟိထိၚ်ဒဝ် မနွံပ္ဍဲရးဒေသဇၞော်တၞၚ်သဳ၊ တွဵုရးဍုၚ်မန်ကဵု ကရေၚ် ကေုာံ တိဍာ်ဆက်စပ်တံဂှ် ဘာကောန်ဂကူမန် (၁၄၆) ဘာနွံတုဲ နကဵုဇြဟတ် အ္စာ၊ အ္စာၝောံ (၈၀၀) တၠပြၚ် ဗ္တောန်ကဵုဒၟံၚ်ရောၚ် ဓမံက်ထ္ၜးလဝ် ပ္ဍဲမုက်လိက်ပရိုၚ်ဗော်ဍုၚ်မန်တၟိရ။
သၟာၚ်နူဂှ်ပၠန် ညးဒေသဂမၠိုၚ်ကဵု ခၟဳသၚ်မန်တံ ပံၚ်ကောံတုဲ အဃောသိုၚ်ခၞံဒၟံၚ် ဘာကောန်ဂကူမန် ပ္ဍဲဒေသမန်နာနာနွံမံၚ်ရောၚ် ဂွံတီကေတ်ရ။
