အခိၚ်ဒးဒုၚ်ဘပဠမံၚ်ကဵု ဂကောံဟက်ကာဏံဝွံ နကဵု AYA Bank သွက်ဂွံလလောၚ်ပ္တိတ် ဇရေၚ်ညးရပ်စပ်စကာ ဗွဲမကၠးဖ္ဍး ကေုာံ သ္ဂောံရေၚ်တၠုၚ်ကဵု အစဳဇန်ပရေၚ်စဵုဒၞာကာတၟေၚ်ဂှ် ဖ္တိုက်ဖၟောဝ်လဝ် ညးရေၚ်တၠုၚ်ပရေၚ်ဒဳဂျေတ်တေဝ်ကီု သီုဂကောံပရဝ်ဂျိတ်အေန်တာနိတ်မျာန်မာ (MIP) နွံရ။
အပ္ဍဲကဵုသၞောတ်ဗာန်ဒဳဂျေတ်တေဝ် AYA မဒှ်ကမၠောန်ရေၚ်တၠုၚ်သြန်ကၟိန်ဍုၚ်ဗၟာမွဲဂှ် တ္ၚဲဏံ ဂိတုဂျောန် (၂၆)၊ အခိၚ်တ္ၚဲစေၚ် (၁း၂၂) နာဍဳဂှ် နူဂကောံဟက်ကာ ＂lapsus$” လုပ်စိုပ်အာတုဲ တၚ်နၚ်ဗွဲမဂၠိုၚ် မံက်တိတ် (ထောၚ်ပြိုဟ်) အာလဝ်ရောၚ် ဂွံတီကေတ်ရ။
တၚ်နၚ်ဒေတာ စဵုကဵု (၁၂၀) GB မံက်တိတ်အာ ဇရေၚ်ဂကောံ “lapsus$” တုဲ ကာလပံက်အကံက်ဗာန် ကော်ဂး PII (Personally Identifiable Information – PII) ဂှ် ဒးစကာ ယၟု၊ ကာဒ်ကောန်ဍုၚ်၊ သက္ကရာဇ်၊ မဂၞန်ဖုၚ် ကေုာံ ဌာန်ဒၟံၚ် မပ္တံတၚ်နၚ်ဗွဲမဂၠိုၚ် ဒးဒုၚ်ကၠတ်မာန်ရောၚ် နူဂကောံပရဝ်ဂျိတ်အေန်တာနိတ်မျာန်မာ သ္ၚဳဂၠိပ်လ္ၚတ်လဝ်ရ။
သွက်တၚ်နၚ်ကၠတ်ဂွံလဝ်ဂမၠိုၚ်ဂှ်ဝွံ ယဝ် AYA Bank ဟွံကဵုသြန်မ္ဂး တၚ်နၚ်ဗွဲမဂၠိုၚ်ဂှ် သွံအာရောၚ် နူဂကောံ＂lapsus$” လလောၚ်ပ္တိတ်လဝ်ပိုဒ်လိက် (ပိုစ်) မွဲရ။
ပြဒ္ဒညာတၚ်နၚ်ပူဂဵုမံက်တိတ်အာဏံဝွံ ကိစ္စပြံၚ်လှာဲဂၞန်ပၞုက်ကဵု ပြံၚ်လှာဲစၞးကာဒ်ဗာန်ဂှ် ကၠောန်သ္ပရေၚ်တၠုၚ် ဟွံလောဲသွာဂှ်ရ နူကဵု AYA သွက်ဂွံကၠောန်သ္ပရေၚ်တၠုၚ်ကဵု ပရေၚ်မၚ်ရံၚ်ကာလဍာ်ဇမၠိၚ်ဂှ် ပၟိက်နွံဒၟံၚ်ရောၚ် ဂးရ။
“ပွမကၠောန်သ္ပရေၚ်တၠုၚ် သၠုၚ်ပ္တိုန်ဒၟံၚ် ပရေၚ်ဂီုကၠီုအဆံၚ်သၠုၚ် ဆေၚ်ကဵုနဲကဲပညာဂှ်တှေ် ၜိုတ်ဂကောံဆေၚ်စပ်တံ လလောၚ်ပ္တိတ်ဓဝ်ဂှ် ဟွံရုံဂပ်ပုဟ်။ အစဳဇန် ဆေၚ်ကဵုပရေၚ်စဵုဒၞာဂှ် ဒးရေၚ်တၠုၚ်ပလေဝ်ပလေတ်ကဵုဏောၚ်” သာ်ဝွံ ညးတာလျိုၚ် ဂကောံပရဝ်ဂျိတ်အေန်တာနိတ်မျာန်မာမွဲတၠ ဟီုရ။
ဗွဲကြဴနူတၚ်နၚ်မံက်တိတ်တုဲဂှ်မ္ဂး နူကဵုမုက်လိက်ဇာနှိက်ပရေၚ်မၞိဟ်ဗဗွဲဓဝ် Bank မွဲတဆံၚ်ဏံ သၟာၚ်နူလလောၚ်ပ္တိတ် သၠုၚ်ပ္တိုန်ဒၟံၚ်ပရေၚ်ဂီုကၠီုတုဲ ဟွံဟီုဂးကဵုသမ္တီ မွဲသာ်ရဂှ်လေဝ် ညးတၠကမၠောန်ရပ်စပ်စကာဒၟံၚ် AYA Bank မွဲတၠဂှ် ဟီုရ။
“ဒှ်ဗီုဏံတုဲ မၞိဟ်တံ ဗီုကဵုကၠုၚ်ပ္တိတ်သြန်အတေၚ်ဂှ်လေဝ် ဟွံမွဲပုဟ်။ နူကဵုဍေံတံ ဗီုကဵုဆက်ဖုၚ်ကဵုပရိုၚ် တၟေၚ်တၟေၚ်တၟဟ်တၟဟ်ဂှ်လေဝ် ဟွံမွဲပုဟ်။ သီုဖအိုတ်ဂှ် ဗီုတြေံ (ဓမ္မတာ) ရ” သာ်ဝွံ ဟီုရ။
ပရူဒဒှ်ဏံဝွံ လ္တူနူပတဝ်က္ဍိုပ်လုတ်လောန် ကု AYA Bank ဂှ်မ္ဂး ကိစ္စဟွံသ္ပကေၚ်ကာ ဆေၚ်စပ်ပရေၚ်ကဵုစဵုဒၞာဂီုကၠီုတၚ်နၚ်ပူဂဵုကီု သီုသၞောတ်ဒဳဂျေဝ်တေဝ်စကာမံၚ် ပ္ဍဲကၟိန်ဍုၚ်ဗၟာဂှ် ဒှ်မံၚ်တၚ်ကော်ဆောရောၚ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ်ရ။
“ကဵုညးတာလျိုၚ်ဆေၚ်စပ်တံဂှ်တှေ် သွက်တၚ်နၚ်ပူဂဵုတံ အတိုၚ်ဥပဒေ အကာဲအရာအာတ်မိက် ဂွံကဵုပရေၚ်စဵုဒၞာမာန်ဂှ်တှေ် ပ္ဍဲဥပဒေဂှ် တၚ်ဍိုန်လျနွံမံၚ်တုဲ ပရေၚ်စဵုဒၞာဟွံမွဲရောၚ်” သာ်ဝွံ သ္ၚဳဂၠိပ်ရ။
သၞောတ် (National Database) ဂကောံဒပ်ပၞာန် ဆက်ဓမံက်မံၚ်ရုပ်ရဴလၟုဟ်ဏံဂှ်လေဝ် တၚ်နၚ်ဇဳဝကောန်ဍုၚ်မွဲမွဲ (Biometric Data) ဂှ်ဝွံ ပ္ဍဲကဵုမွဲဒၞာဲဓဝ်ဂှ် ဂိုၚ်သီပကောံပကေဝ်လဝ်မာန်နွံရ။
ပ္ဍဲ (Database) ဂှ်ဝွံ ဂကောံတၚ်နၚ်ပူဂဵုမွဲမွဲတၠ မပါလုပ်မံၚ်ဂှ်ရ ဒှ်ဒၞာဲ (Hacker) တံ ပစေအ်မတ်မာန်တုဲ ယဝ်တၚ်နၚ်မံက်တိတ်မ္ဂး ပရေၚ်ဂိဆောံလေၚ်ဂၠိုၚ်မာန်ရောၚ် ညးရေၚ်တၠုၚ်ပရေၚ်ဒဳဂျေဝ်တေဝ်တံ ဟီုရ။