ဂိတုဂျူလာၚ် စၟတ်တ္ၚဲ (၇) နူတနေံဏအ်ဝွံ ပ္ဍဲဒေသခရိုၚ်ရနံၚ်၊ ကၟိန်ဍုၚ်သေံဂှ် ကောန်ဍုၚ်ဗၟာ ညးဒးဒုၚ်ရပ်ထိၚ်လဝ်တုဲ ဗၠးတိတ်ကၠုၚ်နူဒုဟ်ဒဏ် လၟိဟ်ၜိုတ် (၁၁၂) တၠဂှ် ညးတာလျိုၚ်ဗၠာဲသၟိၚ်သေံတအ် ကလေၚ်ပလံၚ်ပအပ်ဏာ ဇရေၚ်ဍုၚ်ကွာန်ဌာန်ဇကုပၠန်ရောၚ် ဂွံတီကေတ်ရ။
ကောန်ဍုၚ်ဗၟာ ဗၠးတိတ်ကၠုၚ်နူဒုဟ်ဒဏ် လၟိဟ်ၜိုတ် (၁၁၂) တၠတအ်ဂှ်ဝွံ မၞိဟ်တြုံ (၈၇) တၠ၊ မၞိဟ်ဗြဴ (၂၅) တၠ ပါလုပ်မံၚ်တုဲ ညးတအ်ဂမၠိုၚ်ဂှ် နကဵုဒုဟ်ဖံက်သၞောဝ်ဥပဒေ ကၟိန်ဍုၚ်သေံဂးတုဲ ကဵုလဝ်ဒုဟ်ဒဏ် ရပ်ထိၚ်သာ်ဏအ်တုဲ ကလေၚ်ဗၠးတိတ်ကၠုၚ်ရ။
ကိစ္စဏအ်ဝွံ နူကဵုဗၠာဲသၟိၚ်သေံ ရုၚ်လဝကခရိုၚ်ရနံၚ်ကဵု ရုၚ်ကလုတ်သၟာကမၠောန်ဗၟာတအ်ကီု သီုပါလုပ်ညးလျိုၚ်ဌာနမဆေၚ်စပ် (၉) ဒၞါဲတအ် ချပ်ဇန်သဳကၠဳပညဳညးသ္ကအ်တုဲ ပလံၚ်ပအပ်ဏာ ကောန်ဍုၚ်ဗၟာတအ် လ္ပါ်ဒေသပယျဵုသေံ-ဗၟာ ရနံၚ်၊ ကအ်သံၚ်တေံရ။
တုဲပၠန် ပ္ဍဲဂိတုဂျူလာၚ် စၟတ်တ္ၚဲ (၂) တုဲကၠုၚ်ဏအ်လေဝ် ကောန်ဍုၚ်ဗၟာ ညးဒးဒုၚ်ရပ်ထိၚ်လဝ်တုဲ ဗၠးတိတ်ကၠုၚ်နူဒုဟ်ဒဏ် လၟိဟ် (၉၅) တၠဂှ် ညးတာလျိုၚ်ဗၠာဲသၟိၚ်သေံတအ် ကလေၚ်ပလံၚ်ဏာလဝ် ဇရေၚ်ဍုၚ်ကွာန်ဌာန်ဇကု နွံကၠုၚ်လဝ်ရ။
ဆဂး ကောန်ဍုၚ်ဗၟာ ညးဒးဒုၚ်ကလေၚ်ပလံၚ်ဏာ ဇရေၚ်ဍုၚ်ကွာန်ဌာန်ဇကုဗွဲမဂၠိုၚ်ဂှ်မ္ဂး နူကဵုတဲဗၠာဲသၟိၚ်သေံတအ်မွဲတဆံၚ် ဟိုတ်နူသၠောဲပအပ်ကဵု ဗၠာဲသၟိၚ်ဗၟာဂှ်ရ သ္ဂောံတိတ်ဗၠး နူဒုဟ်ဗၠာဲသၟိၚ်ဗၟာတအ်မာန်ပၠန်ဂှ် ညးလ္ၚဵုတအ် ကဵုဩန်ဟွံမာန်တုဲ ဂြိပ်တိတ်လေဝ်နွံ၊ ညးလ္ၚဵုပၠန်ဂှ် ဍေံစကာကဵုသ္ပကောန်ပၞာန်ဗၟာ ကဵုယိုက်ဂၠေၚ်ဝန်ပၞာန်လေဝ် နွံကၠုၚ်ရ။
ပ္ဍဲသၞာံ (၂၀၂၆) ဏအ်ဂှ် ကောန်ဍုၚ်ဗၟာ ညးဗၠးတိတ်ကၠုၚ်နူဒုဟ်ဒဏ်တုဲ ဒးဒုၚ်ပလံၚ်လဝ် (၉၇၂) တၠ၊ သၞာံ (၂၀၂၅) ဂှ် (၂၀၇၀) တၠ၊ သၞာံ (၂၀၂၄) ဂှ် (၂၀၀၀) တၠ ဒးဒုၚ်ပလံၚ်လဝ် လ္ပါ်ဒေသပယျဵုသေံ-ဗၟာ ရနံၚ်၊ ကအ်သံၚ်ဏအ် နွံကၠုၚ်အဆက်က်ရ။