ပ္ဍဲအရာပ် “ညောၚ်ပၚ်ဆိပ်” ၊ ဍုၚ်မတ်မလီု၊ တွဵုရးဍုၚ်မန်ဝွံ ဂိတုဂျူလာၚ် (၆) ၊ တ္ၚဲဏံ ဒးဘဲလဗိုတ်ကျာမေလံၚ်တုဲ ဘာကျာ်ဟိန္ဒူကဵု သ္ၚိဒၟံၚ် (၁၅) မ လီုလာ်အာနွံရောၚ် ဂွံတီကေတ် နူဂကောံဟံၚ်ပြာ်မၞိဟ်တံရ။
တ္ၚဲဏံ ဂိတုဂျူလာၚ် (၆) ၊ အခိၚ်နူဂယးပြဟ် ၜိုတ် (၄) နာဍဳကဝက်ဂှ် အပ္ဍဲအရာပ်ကုန်ကျာ် “ဘုရားကုန်း” ၊ အရာပ် “ညောၚ်ပၚ်ဆိပ်” ဂှ် ဒးအာဘဲလဗိုတ်ကျာမေလံၚ်ရ။
ဟိုတ်နူဘဲလဗိုတ်ကျာမေလံၚ်ဂှ်ရ ဘာကျာ်ဟိန္ဒူမွဲမကဵု သ္ၚိဒၟံၚ် ၜိုတ် (၁၅) မ မၞုံအပ္ဍဲအရာပ်ကုန်ကျာ်ဂှ် ကၟဳကယျာတုဲ လီုလာ်အာလဝ်ကီုရောၚ် ဂွံတီကေတ် နူဂကောံဟံၚ်ပြာ်မၞိဟ်တံရ။
“ပ္ဍဲကဵုကုန်ကျာ် “ညောၚ်ပၚ်ဆိပ်” ဂှ် တ္ၚဲဏံ အခိၚ်နူဂယးပြဟ် ၜိုတ် (၄) နာဍဳကဝက်ဂှ် လဗိုတ်ကျာမေလံၚ်ပိုက်ဏာရ။ သ္ၚိ ၜိုတ် (၁၅) မ ဒးအာရ။ သ္ၚိကၟဳယျာအာဖအိုတ်လေဝ်နွံရ။ တၞံဆုဒေါမ်လေဝ်နွံရ” သာ်ဝွံ ကောန်ဂကောံ ဂကောံဟံၚ်ပြာ်မၞိဟ်မွဲတၠဂှ် ဟီုရ။
ဟိုတ်နူလဗိုတ်ကျာမေလံၚ် လွိၚ်ပိုက်ဏာဂှ်တုဲ တၞံဆုဒေါမ်၊ သ္ၚိဒၟံၚ်လီုလာ်နွံကီုလေဝ် မၞိဟ်ဒးဘဲဇီုကပိုက်ဟွံမွဲ ဂးရ။
ဆဂး ပရေၚ်ဒးဘဲဇီုကပိုက်လီုလာ်ဂမၠိုၚ် ပ္ဍဲအရာပ် “ညောၚ်ပၚ်ဆိပ်” ဂှ် ဂကောံဟံၚ်ပြာ်မၞိဟ်၊ ဂကောံပၠိုတ်ပၟတ်တံ ပသောၚ်သအးဇ္ၚးဒၟံၚ်နွံရ။
ဂိတုဂျူလာၚ် စၟတ်တ္ၚဲ (၅) ၊ နူတနေံဏံဂှ်လေဝ် အပ္ဍဲအရာပ် “ကဒါ” ၊ ဍုၚ်ပံၚ်ဂှ် လဗိုတ်ကျာမေလံၚ် လွိၚ်ပိုက်ဏာတုဲ ဘာလကျာ် ကေုာံ စမြိုၚ်ဆေၚ်စပ်ကဵုဌာနဂမၠိုၚ်ကီု သ္ၚိဒၟံၚ်ကီု သီုဖအိုတ် (၇၀) မပြၚ် လီုလာ်အာနွံရောၚ် ဂွံတီကေတ် နူညးဒေသတံရ။
ပ္ဍဲတွဵုရးဍုၚ်မန်ဝွံ ဒၞာဲဒေသမွဲမဂၠိုၚ်ဂှ် ဗြဲဇၞော်မာန်တုဲ မွဲကရောံကဵုဗြဲဇၞော် လၟေၚ်ဒေသ ကေုာံ ဒၞာဲလ္ၚဵုတံဂှ် လဗိုတ်ကျာမေလံၚ်ထတ်ကီု၊ ဍာ်ဇၞော်ကီု ကေုာံ တိလာ်ကီု ကတဵုဒှ်မာန်ရောၚ် ဂိတုဂျူလာၚ် (၇) ၊ တ္ၚဲဏံအခိၚ်နူဂယးဂှ် နူဌာနက္ဍိုက်က္ဍိုပ်ဗြဲကျာတံ လလောၚ်ပ္တိတ်လဝ်ရ။