သၞာံ (၂၀၂၆) ၊ နူဂိတုဂျူလာၚ်မံက်တုဲဂှ်ဝွံ ပ္ဍဲပွိုၚ်မွဲသတ္တဟဏအ် ပ္ဍဲပယျဵုသေံ-ဗၟာ လ္ပါ်ဒေသကျာ်ပိဂှ်မွဲတဆံၚ် ဗၠာဲသၟိၚ်သေံတအ် ရပ်စပ်ဂွံလဝ် ကောန်ဍုၚ်မန်ဗၟာ မၞိဟ်ကၠတ်လုပ်ဍုၚ်သေံ လၟိဟ် ၜိုတ် (၃၀) တၠနွံရောၚ် ဂွံတီကေတ်ရ။
သွက်သ္ဂောံလုပ်ကၠောန်စကမၠောန် ပ္ဍဲကၟိန်ဍုၚ်သေံ ဂးတုဲ ကောန်ဍုၚ်မန်ဗၟာဗွဲမဂၠိုၚ်တအ်ဂှ် နူကဵုဒေသပယျဵုကျာ်ပိဂှ်မွဲတဆံၚ် အဃောကၠတ်လုပ်မံၚ်ပ္ဍဲဍုၚ်သေံဂှ်မ္ဂး လ္ပာ်ဒေသ သၚ်္ခဠၜုရဳ၊ ထာခၞောန်၊ ကမ္မရဳဂှ် ဒပ်မၚ်ဂီုကၠီုပၞာန်သေံ/သၞေဟ်ကၚ်စၟဳစၟတ်တၞံပကုက်တအ် ရပ်စပ်ဂွံလဝ်နွံရ။
အကြာတ္ၚဲသတ္တဟဏအ်ဂှ်မ္ဂး ပ္ဍဲဂိတုဂျူလာၚ် စၟတ်တ္ၚဲ (၂) ဂှ် (၄) တၠ၊ ဂျူလာၚ်စၟတ်တ္ၚဲ (၅) ဂှ် (၁၅) တၠကဵု ဂျူလာၚ်စၟတ်တ္ၚဲ (၆) တ္ၚဲဏအ်ပၠန်ဂှ် (၇) တၠ၊ ဗၠာဲသၟိၚ်သေံတအ် ရပ်ဂွံမံၚ်ကောန်ဍုၚ်မန်ဗၟာ ညးကၠတ်လုပ်ဍုၚ်သေံတအ် အဆက်က်နွံရ။
ဟိုတ်နူပရေၚ်ဍုၚ်ကွာန်ကၟိန်ဍုၚ်ဗၟာ ဟွံၜိုဟ်ဩိုဟ်တုဲ အကြာကြေပ်ဂြတ်မံၚ် ပရေၚ်ကမၠောန်ဂှ်မ္ဂး သ္ဂောံတိတ်အာကၠောန်ကမၠောန် ကၟိန်ဍုၚ်ဇိုၚ်ဝုတ်ဒိုဟ် ဇရေၚ်ဍုၚ်သေံတုဲ ဒးကဵုကၠုၚ်စရိတ်ဂၠံၚ် ကုဃံၚ်ထပၠုပ်မၞိဟ်တအ် ညးမွဲတၠမ္ဂး ဩန်သေံ မွဲလက်ၝာတ်လ္ပါ်လ္တူ အိုတ်ကၠုၚ်မံၚ်ရ၊ ဆဂး ညးလ္ၚဵုတအ် ဟွံစိုပ်ဒၞာဲကမၠောန်ဇကုကၠောန်ဂှ်မွဲသာ် အကြာဂၠံၚ်ဍာန်ဂှ်ဟေၚ် ဒးဒုၚ်ရပ်စပ်မံၚ်ကဵု ဗၠာဲသၟိၚ်သေံတအ်တုဲ သြန်တအ်ဂှ် ဟွံကလေၚ်ဂွံမွဲသာ် ဒးဆောံလေၚ်ကၠုၚ်နွံရ။
အပ္ဍဲပယျဵုသေံ-ဗၟာ လ္ပါ်ဒေသကျာ်ပိဂှ်ဝွံ တုဲကၠုၚ်ပ္ဍဲဂိတုဂျောန်ဏအ် ကောန်ဍုၚ်မန်ဗၟာ ညးကၠတ်လုပ်စိုပ်ဍုၚ်သေံတအ် နွံအောန်မံၚ်ကီုလေဝ် စိုပ်ကၠုၚ်ဂိတုဂျူလာၚ်ဏအ် ဗၠာဲသၟိၚ်သေံတအ် ရပ်စပ်ဂွံ ကောန်ဍုၚ်မန်ဗၟာ ညးကၠတ်လုပ်ဍုၚ်သေံတအ် ထပ်ပဵုတိုန်ကၠုၚ်သောဲသောဲပၠန်ဂှ် ဂွံတီကေတ်ရ။
ဗီုရုပ် – Thai News