က္ၜင်ပၞာန်ဂကောံဒပ်ပၞာန် ၜိုတ် (၂၀) ဖ္ဍိုက်၊ ဒဳဒစးကၠုင် အတိုင်ဂၠံင်ဍာ်ၜဳဨရာဝတဳ၊ ဇရေင်ဍုင်ဗာန်မဝ်ဂှ် ဒပ်ပၞာန်ဗၠးၜးကချေင် (KIA) ကဵု ဒပ်မဟာမိတ်ဂမၠိုင်တံ ပန်ဗ္တိုက်ပလီုပလာ်မာန်လဝ်ရောင် ညးလျိုင်လလောင်ပရိုင် (KIA) သ္ကိုပ်ဗိုလ်ဇၞော်နဝ်ဘူ ဟီုရ။
က္ၜင်ပၞာန် ၜိုတ် (၁၅) ဖ္ဍိုက် ဒဳဒစးကၠုင် နူသၞေဟ်ဂဝ်ဝိန်၊ ဍုင်အဝ ဇရေင်ဍုင်ဗာန်မဝ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၂) တုဲကၠုင်ဏံ ဒပ်မဟာမိတ်ဂမၠိုင်ကဵု (KIA) တံ ပံင်ကောံဗ္တိုက်ဏာလဝ် ကြပ်ပွိုင်ဍုင်ယှိုဲကူ၊ တွဵုရးကချေင်ရ။
“ၜင်မူစိဖ္ဍိုက်ရောဟီုဂှ်တှ်ေ ပိုဲဂွံဟီု နကဵုလၟိဟ်ဂၞန်ချိုတ်ချိုတ်ပၠိုတ်ပၠိုတ်မာန်ဂှ် ဂစာန်မံင်ရ။ ဆဂး ကြပ်အိုတ်ဂှ်တှ်ေ အကြာ (၂၀) ဖ္ဍိုက်ရ။ ၜိုတ် (၂၀) ဖ္ဍိုက်ဂှ်တှ်ေ ပိုဲတံပန်တုဲမှ အကာဲအရာပလီုပလာ်မာန်နွံရ” သာ်ဝွံ သ္ကိုပ်ဗိုလ်ဇၞော်နဝ်ဘူ ဟီုရ။
ပ္ဍဲကဵုက္ၜင်ပၞာန်ဂှ်ဝွံ ကောန်သဂံင်ဒပ်ပၞာန်ဂမၠိုင်ကဵု ဂကောံသ္ၚိကၟိန်ဒပ် ဗွဲမဂၠိုင် ပါဗက်ကၠုင်တုဲ ဇြဟတ် (၁၀၀) ပြင် ဒုင်ကမျဖျေံလွဟ် ကု (KIA) နွံရောင် ဂးရ။
ကုကောန်သဂံင် ကေုာံ ဂကောံသ္ၚိကၟိန်ဒပ် မရပ်ဂွံလဝ်ဂမၠိုင်ဂှ်ဝွံ အခိင်လၟုဟ်ဏံ စၟဳစၟတ်သၟာန်သၟုက်ဒၟံင်ဖိုဟ်ရောင် (KIA) ဂးရ။
လ္ပာ်ဂကောံဒပ်ပၞာန်တံ ဆက်ဗ္တိုက်ပြုပြေင်ဒၟံင်ပၞာန်ဂှ်ရ အပ္ဍဲတွဵုရးကချေင်ဝွံ ပေဲါဗ္တိုက်ဂမၠိုင် ဆက်ကတဵုဒှ်ကၠုင်မာန်ရောင် သၟာပရေင်ဍုင်ကွာန်ကချေင်မွဲတၠ ဟီုရ။
“ထ္ပက်/ပြုပြေင်မံင်ပၞာန်ကွေံကွေံရ၊ လ္ပာ်ဏံလေဝ် (KIA) တံ ဒုင်ပၞာန်တုဲမှ ဗ္တိုက်ရ၊ ဗီုဏံဟီုတှ်ေ ပေဲါပၞာန်ဂှ် ဇၞော်ကၠုင်ဏောင်။ ဣညအ်ဂှ်တှ်ေ ဗီုကဵုဟီုမံင် ပရေင်ၜိုဟ်လလမ်ဂှ်တှ်ေ ဗီုဍေံကဵုဍေံ သ္ၚောဲအာရ။ ဟိုတ်ဂှ်ရ နွံပၟိက်ကဵု ပရေင်ၜိုဟ်လလမ်ဟီုတှ်ေ ကိုပ်ကၠာအိုတ်ဂှ် ဒေံါပန်ပှော်အလုံဍုင်တုဲမှ ဟီုအရေဝ်ညးသ္ကံတှ်ေ ဒှ်ကၠုင်ဏောင်” သာ်ဝွံ ညးဟီုရ။
က္ၜင်ပၞာန် ၜိုတ် (၁၅) ဖ္ဍိုက် ဒဳဒစးကၠုင် အတိုင်ဂၠံင်ဍာ်ၜဳဨရာဝတဳ၊ ဂိတုသေပ်တေမ်ဗာ စၟတ်တ္ၚဲ (၂) ဂှ် (KIA) ဗ္တိုက်ဏာလဝ် ကြပ်ပွိုင်ဍုင်ယှိုဲကူတုဲ ဗၠိုက်အာဍာ် (၁) ဖ္ဍိုက်၊ တူပၟတ်လီုလာ်အာ (၄) ဖ္ဍိုက်နွံဂှ် ဂွံတီကေတ်ရ။
တုဲပၠန် ပ္ဍဲဂိတုသေပ်တေမ်ဗာ စၟတ်တ္ၚဲ (၁၆) တုဲကၠုင်ဏံ ပၞောဝ်ကဵုက္ၜင်ပၞာန် (၃) ဖ္ဍိုက် ဒဳဒစးကၠုင်ဂှ်ဝွံ မွဲဖ္ဍိုက်ဂှ် ဟိုတ်နူ (KIA) ပန်ဗ္တိုက်ဏာဂှ်ရ ဗ္ကပ်ဗၠိုက်အာဍာ်တုဲ ၜါဖ္ဍိုက်ဂှ် ဒးက္လေင်ဂတးစဴအာ ဇရေင်ယှိုဲကူတေံကီု ဂွံတီကေတ်ရ။
“လၟုဟ်ပြဟ်ဟ်ဏံ အကာဲအရာပရေင်ပၞာန်ဂှ်တှ်ေ ကြံင်မ္ၚိုဟ်မံင် ပ္ဍဲဗာန်မဝ်၊ ယှိုဲကူ၊ သေန်ခါန်ဂှ်ရ။ အခိင်ဟွံရုဲ အကာဲအရာပေဲါဗ္တိုက်ဒှ်မာန်နွံရ။ တုဲတှ်ေ လ္ပာ် (ခေါင်လန်ဖူး) ဂှ်လေဝ် အခိင်ဟွံရုဲ ဒှ်ပေဲါဗ္တိုက်မာန်ရ” သာ်ဝွံ သ္ကိုပ်ဗိုလ်ဇၞော်နဝ်ဘူ ဟီုရ။
လ္ပာ်ဂကောံဒပ်ပၞာန်တံ ယဝ်ဆက်ဗပေင်ဇြဟတ်ပၞာန် ကေုာံ ဆက်ထ္ပက်/ပြုပြေင်ပၞာန်မ္ဂး ပေဲါဗ္တိုက်သ္ကာတ်မြဟ်ကၠုင်မာန်ရဂှ်လေဝ် သ္ကိုပ်ဗိုလ်ဇၞော်နဝ်ဘူ ဟီုဂးလဝ်ရ။