ပေါဲဗတိုက်ပ္ဍဲဒေသ အကြာဍုင်မန်ကဵု ဍုင်ကရေင် ကွာန်ပုလိင်တုဲဂှ် ဒပ်ပၞာန်သီုၜါလ္ပာ်တအ် ချဳဒရာင်ဗပေင်ဒၟံင်ဒြဟတ်ပၞာန်နွံတုဲ ညးဍုင်ကွာန်ဒေသတအ် ဒှ်ဒၟံင်ဂဝိင်ကဵု ဘဲမၠံက်ဇၞော်ကဵု ဗမ်က္ၜင်ကျာနွံရောင် ညးဒေသမွဲတၠ ဟီုလဴထ္ၜး ရ။
လၟုဟ်မ္ဂး ပ္ဍဲဒေသကွာန်ပုလိင် ကရပ်ကွာန်ခၠဵု တဂေါန်တိုင်ဂှ် ပေါဲဗတိုက်ညိင်သ္ၚိတ်မံင်ကီုလေဝ် နူကဵုဒပ်မၠံက်ဇၞော် (၃၀၈) ဗၟံက်ကွာန်အၜေတ်ဂှ် ပန်ထဍိုင်ဏာဒၟံင်အရိုဟ်တ္ၚဲ/ဗတမ်ကီု၊ ဒရုင်ကဵု က္ၜင်ကျာပၞာန် ဂေတ်ပဝ်ဒၟံင်ကီုတုဲ ညးဒေသတအ် ဖေက်ဂွိင်ဒၟံင်ကဵု ဘဲမၠံက်ဇၞော်နွံရ။
“ပေါဲပၞာန်ဂှ် ညိင်သ္ၚိတ်မံင်၊ ဆဂး မၠံက်ဇၞော်နူကဵုဒပ်အၜေတ်တေံ ကၠဟ်ထဍိုင်ဖျေံမံင် အကြာကွာန် အရိုဟ်တ္ၚဲ အရိုဟ်ဗတမ်နွံမံင်၊ ပၞာန်ကရေင်ကဵု ပၞာန်မန်တအ်ကီု ချဳဒရာင်ဗပေင်လဝ်ဒြဟတ်နွံမံင်၊ ဗီုဂှ်ကီု လ္ပာ်ပၞာန်ဗၟာဂှ်လေဝ် ထပ်ဇက်အာမံင် နွံမံင်၊ ဒရုင်ကီု က္ၜင်ကျာကီု ဂေတ်ပဝ်ဒၟံင်သီုဗတမ်တ္ၚဲတုဲတှ်ေ ညးဍုင်ကွာန်တအ် ဖေက်မံင်မၠံက်ဇၞော်၊ ဘဲက္ၜင်ကျာကဵု ဒရုင် ကွေံကွေံ” သာ်ဝွံ မၞိဟ်တြုံနူကွာန်တဂေါန်တိုင် ပါဲဓလေတ်ဒၟံင်ပၞာန် မၞုံအာယုက် (၄၀) သၞာံပြင်မွဲတၠ ဟီုထ္ၜးရ။
ကြဴနူကဵုပေါဲဗတိုက် ပ္ဍဲကွာန်ပုလိင်တုဲဂှ် လ္ပာ်ဒပ်ပၞာန်ဗၟာတအ် ကၠဟ်ထဍိုင်ဏာဒၟံင် မၠံက်ဇၞော်အကြာကွာန် မွဲဒမြိပ် ကွာန်ခၠဵု၊ တဂေါန်တိုင်၊ နုင်တိုင်ထောင်ဂှ်နွံကီု၊ တုဲပၠန် က္ၜင်ကျာပၞာန်လေဝ် ပဝ်ဂေတ်ဒၟံင်အကြာကွာန်တအ် အရိုဟ်တ္ၚဲ/ဗတမ် နွံဒၟံင်ရ။
“မိင်ပရိုင်ဂှ် လ္ပာ်ဒပ်ပၞာန်ဗၟာ ဂၠံင်အၜေတ် ပကောံဇက်တိုန်မံင်နွံ၊ ဆဂး ဟွံစိုပ်လ္ပာ်ကွာန်ပုလိင်ဏံဏီ၊ လ္ပာ်ကျာ်မြဟ် ဂၠံင်တံင်ကလေဝ်ဂှ်လေဝ် ဒပ်ပၞာန်ဗၟာတအ် ဇက်တိုန်နွံမံင်၊ လ္ပာ်ဂကောံပၠန်ဂတး ဒပ်ကရေင်ကဵု ဒပ်မန်တအ်လေဝ် ဗပေင် ပကောံဒြဟတ်တုဲ ချဳဒရာင်မံင် နွံဟွံအောန်တှ်ေ လအ်ကဵုပြဟ်ဂှ် ဘိုအ်ဂွံဒှ်ပၠန်ဂှ် နွံချိုတ်ပၠိုတ်ရ၊ ညးဍုင်ကွာန်တအ်ဂှ် ဒးဂွိင်မၠံက်ဇၞော်ကဵု က္ၜင်ကျာရ” သာ်ဝွံ ညးဆက်ဟီုရ။
ပေါဲဗတိုက်အကြာ ဂကောံပၠန်ဂတးမန်/ကရေင်တအ်ကဵု ဒပ်ပၞာန်ဗၟာ က္တဵုဒှ်လဝ် တုဲကၠုင်အံက်တိုဝ်ဗာ (၁၃၊ ၁၄) ပွိုင်ၜါတ္ၚဲတုဲဂှ် ဒၟာနူလ္ပာ်ဒပ်ပၞာန်ဗၟာတအ် ဒးလဝ်ဘဲချိုတ်ဂျိုင်ဂၠိုင်ဂှ်တုဲ သ္ဂောံကလေင်ဇက်ထပက်တိုန်ပၠန်ဂှ် ပလေဝ်ဗပေင် ဒၟံင်ဒြဟတ် သွက်ဂွံဇက်ထပက်ပၞာန်နွံရောင်ဂှ်လေဝ် ညးဒေသတအ် ထေင်ခယျဒၟံင်အိုတ်ရ။