ပ္ဍဲကြပ်ကွာန် “ပုလိန်”၊ ဂကောံကွာန်တဃောန်တိုၚ်၊ ပွိုၚ်ဍုၚ်လှာဒကှ်၊ တွဵုရးကရေၚ်ဂှ် အကြာဒပ်ကမ္မယှေန်ပၞာန်ကဵု ဒပ်ပံၚ်ကောံပၠန်ဂတးတံ က္တဵုဒှ်ပေဲါဗ္တိုက်ၜါလ္ပာ် ပွိုၚ် (၂) နာဍဳနွံရောၚ် ညးဒေသတံ ဟီုရ။
ဂိတုအံက်တဝ်ဗာ (၁၂) ၊ နူတနေံဏံ စနူအခိၚ်သဝ်တ္ၚဲ (၅) နာဍဳ စဵုကဵု (၇) နာဍဳဗ္တံဂှ် က္လေၚ်ပန်ပှော်မံၚ်ညးသ္ကံ နကဵုလွဟ်ဇၞော်၊ လွဟ်ဍောတ်ရောၚ် ညးဒေသ ဂကောံကွာန်တဃောန်တိုၚ်မွဲတၠဂှ် ဟီုရ။
“သဝ်တ္ၚဲဂှ် ရမျာၚ်လွဟ်ဇၞော်ကီု၊ ရမျာၚ်က္လေၚ်ပန်ပှော်ကီု၊ ဒပ်ပၞာန်ဗၟာ စှေ်ကၠုၚ်လ္ပာ် (ပုလိန်) မိၚ်ပရိုၚ်ရ။ စိုပ်အခိၚ်သဝ်တ္ၚဲဂှ်ဗက် မိၚ်ကၠုၚ်ရမျာၚ်ပန်ပှော်ရ။ မဇၞော်ဂှ်တှေ် မွဲဝါ ၜိုတ် (၃) မစှေ် မိၚ်ရ။ မိၚ်ရမျာၚ်မဇၞော်ဂှ် လ္တူစှ်မနွံဏောၚ်” သာ်ဝွံ ညးဒေသဂှ် ဟီုရ။
ဟိုတ်နူရမျာၚ်ပန်ပှော်ဂှ်တုဲ ကွဳစက်ဖ္ဍိုက်ညးအာတရဴ ကျာ်ပိ-မုဟ်ဍုၚ်၊ ကွဳစက်ဖ္ဍိုက်ကပေါတ်ဂမၠိုၚ်တံ ဟွံဂံၚ်ဆက်တရဴ လ္ပာ်သ္ကုတ်ဂၠံၚ် လှာဒကှ်-အၜေတ်တုဲ ဒေံါဇူဒီုဒၟံၚ် ပ္ဍဲကဵုကွာန်ကြပ်ကြပ်တံဂှ်ရောၚ် ညးဒေသလ္တူဂှ် ဆက်ဟီုလဝ်ရ။
“ပ္ဍဲကဵုဂၠံၚ်ဂှ်တှေ် ဒပ်မန်ကီု၊ ဒပ်ကရေၚ်ကီု ချဳဓရာၚ်မံၚ်ဂှ် ဂွံဆဵုကေတ်တှေ် ကာကျာ်ပိတံ ဟွံဂံၚ်အာ လ္ပာ်ဂၠံၚ်ဂှ်ရပုဟ်။ ဇှ်တှေ် သွက်ဂွံတိက် ဒၞာဲကြပ်ကြပ်တံဂှ်ရ။ ကာလ္ၚဵုတံဂှ်လေဝ် က္လေၚ်အာ လ္ပာ် (ဝၚ်ရော်ဆိပ်ကြီး) တေံရ” သာ်ဝွံ ဟီုရ။
ကွာန်မနွံအပ္ဍဲဂကောံကွာန်တဃောန်တိုၚ် ဗွဲမဂၠိုၚ်ဂှ် ဒပ်ပၞာန်ဗၠးၜးကရေၚ် (KNLA) ကဵု ဂကောံဒပ်ပံၚ်ကောံပၠန်ဂတးတံ အုပ်ဓလီုလဝ်တုဲ ပ္ဍဲကွာန်တဃောန်တိုၚ်ဂှ် ဗဒိုပ်ဒပ် (ဇီးဖြူကုန်း) ကမ္မယှေန်ပၞာန်နွံမွဲရောၚ် ဂွံတီကေတ်ရ။
သွက်ဗဒိုပ်ဒပ်ဂှ်မ္ဂး ပြံၚ်လှာဲသ္ဂံၚ် နူတမ်ဒပ်အၜေတ် ဖျေံသဇိုၚ်မုဟ်ဍုၚ်ကီု၊ သွက်ဂွံပလံၚ်ဗ္စိုပ်ဇွောံမစၞစဂှ် စကာသ္ကုတ်ဂၠံၚ် အၜေတ်-ပုလိန်-တဃောန်တိုၚ်တုဲ လုပ်စိုပ်မံၚ်နွံဂှ် ဂွံတီကေတ်ရ။
ပ္ဍဲလ္ဒောဝ်ဂိတုအံက်တဝ်ဗာ၊ သၞာံ (၂၀၂၅) တုဲကၠုၚ်ဏံရ ကရောၚ်ပၞာန်ကမ္မယှေန်ပၞာန် ဇြဟတ်ကဵုကၠံ နူတမ်ဒပ်အၜေတ်ဂှ် စကာသ္ကုတ်ဂၠံၚ် အၜေတ်-ပုလိန်တုဲ သွက်ဂွံကၠောန်သ္ပ ပရေၚ်ပြံၚ်လှာဲဒပ် ဇရေၚ်ဗဒိုပ် (ဇီးဖြူကုန်း) ဂှ် လုပ်စိုပ်ကၠုၚ်ဏီရ။
အဃောဂိုတ်ဂ္စာန် သွက်ဂွံလုပ်စိုပ် ဇရေၚ်ဗဒိုပ်ဂှ်ကဵု လုပ်စိုပ်တုဲဂှ်မ္ဂး ပန်ပှော်မံၚ်လွဟ်ဇၞော်ဆဆဵု ပ္ဍဲဒၞာဲပွဳဗွိုၚ်ကြပ်ကြပ်တံဂှ်တုဲ ပရေၚ်သ္ၚိဒၟံၚ်လီုလာ် ကေုာံ ပရေၚ်ဒးဘဲဝပ်ဂမၠိုၚ်လေဝ် က္တဵုဒှ်မံၚ်နွံရောၚ် ဂွံတီကေတ်ရ။