ဒၞာဲသ္ကိုပ်ဗိုလ်ဇၞော်ကျဝ်ဇြဲမျေအ် မယိုက်ဂၠေင်မံင်တာလျိုင် နဒဒှ်ဝန်ဇၞော်ကေင်ကာပယျဵု ကေုာံ ပရေင်ဂီုကၠီု ဂကောံအလဵုအသဳ တွဵုရးဍုင်မန်ဂှ် ခါန်ကၞက်ပြံင်လှာဲဏာ သ္ကိုပ်ဗိုလ်ဇၞော်ယျေဝ်ထောဋ်ရောင် ကမ္မယှေန်ပေဲါရုဲမာဲကၟိန်ဍုင် လလောင်ပ္တိတ် ပ္ဍဲဂိတုအံက်တဝ်ဗာ စၟတ်တ္ၚဲ (၂၁) ၊ နူတနေံဏံရ။
သၟာင်နူဝန်ဇၞော်ကေင်ကာပယျဵု ကေုာံ ပရေင်ဂီုကၠီု တွဵုရးဍုင်မန်တုဲ ညးစၞးကၠတ်ထဝ် တွဵုရးကယျာ၊ ရးသေတ်ဂိုင်၊ မဂွေ၊ တွဵုရးရခေင်၊ ရးလ္ဂုင် ကေုာံ တွဵုရးသေံ သီုဖအိုတ် (၇) တၠတံဂှ်လေဝ် ပြံင်လှာဲဏာလဝ်ရောင် လလောင်ပ္တိတ်လဝ်ရ။
ဝန်ဇၞော်ကေင်ကာပယျဵု ကေုာံ ပရေင်ဂီုကၠီု တွဵုရးဍုင်မန် သ္ကိုပ်ဗိုလ်ဇၞော်ကျဝ်ဇြဲမျေအ် ဒးဒုင်ပြံင်လှာဲဂှ်ဝွံ ဆေင်စပ်ကဵု အမှုသွံရာန်ဗၞိက်သေံဟွံလုပ်သၞောဝ်၊ အမှုစလာဘ်ဗဇဴ၊ ဝိုင်ဝေင်္ၚှင်လံင်သြန်ဟွံလုပ်သၞောဝ်တုဲ ယၟုပရေံမံင်ရ။
ပ္ဍဲတွဵုရးဍုင်မန်ဝွံ ပတေင်ဓရတ်လဝ် ပရေင်ပၠောပ်ကပေါတ်ဗၞိက်သေံကီုလေဝ် သၟာဗၞိက် ညးမကဵုလဝ်သြန်ဗွဲမဂၠိုင် ကုသ္ကိုပ်ဗိုလ်ဇၞော်ကျဝ်ဇြဲမျေအ်ဂှ် ဂွံဒၟံင်အခေါင်ပၠောပ်ကပေါတ်ဗၞိက်သေံ ဗွဲမဗၠးၜးရောင် ဂွံတီကေတ် နူသၟာဗၞိက်လ္ၚဵုတံရ။
တုဲပၠန် သ္ကိုပ်ဗိုလ်ဇၞော်ကျဝ်ဇြဲမျေအ်ဝွံ ပံင်တောဲကဵု သ္ကိုပ်ဝန်ဇၞော်တြေံ တွဵုရးဍုင်မန် ဥူအံင်ကျဳတုင်တုဲ ကဵုလဝ်အခေါင်ပံက်ဝိုင်ဝေင် ညံင်ရဴလုပ်သၞောဝ် (ဗဗွဲဓဝ်) ရဂှ်လေဝ် ပရိုင်မံက်တိတ်ဒၟံင်ရ။
သ္ကိုပ်ဗိုလ်ဇၞော်ကျဝ်ဇြဲမျေအ်ဝွံ ဗွဲကြဴနူဒပ်ပၞာန်သီအဝဵုတုဲ သၞာံ (၂၀၂၂) ဂှ် ဂွံဒုင်ခါန်ကၞက်လဝ် နဒဒှ်ဝန်ဇၞော်ကေင်ကာပယျဵု ကေုာံ ပရေင်ဂီုကၠီု တွဵုရးဍုင်မန်ရ။
ပၞောဝ်ကဵုညးစၞးကၠတ်ထဝ် တွဵုရး / ရးဒေသဇၞော် (၇) တၠ ဒပ်ပၞာန်မကၠောန်သ္ပ ပရေင်ပြံင်လှာဲဂှ်ဝွံ ညးလ္ၚဵုတံဂှ် ဒးဒုင်တေင်လဝ် နကဵုအမှုစလာဘ်ဗဇဴ၊ တာလျိုင်ဟွံပြေ နွံရဂှ်လေဝ် ပရိုင်မံက်တိတ်ဒၟံင်ရ။