စေတနာ လှာၜိုပ် (၂၁-၇-၂၀၂၂)
ပိုဲမၞိဟ်တံ ဂျိုၚ်ဒၟံၚ်ပ္ဍဲလိုက်လောက မွဲခဏဂှ် ပြိုၚ်ပ္ကာန်ဒၟံၚ်ဘဝ ကျမာန် ဝါတ်လောဲ အိုတ်ရ။ ၜိုန်ဇကုပြိုၚ်ဒၟံၚ် ဂၠံၚ်တရဴဏံကီုလေဝ် ပရေၚ်ပရဟ်ဒုၚ် သွက်ဘဝဂှ် ဗီုညးကဵုညး တဵုပယျေဝ်ဒၟံၚ်အိုတ်တုဲ တတ်ထပါဒၟံၚ် သွက်ဘဝဂွံဇၞော်သၠုၚ်၊ ဒုၚ်ဒဒိုက်တုဲ ဂၠာဲဒၟံၚ်အခေါၚ်အရာနာနာ ဂွံဆဵုကေတ်ရ။
မၞိဟ်တံ ဂျိုၚ်တဴဒၟံၚ်လမျီုအိုဿီုဂှ် အစောံစရာဲ သတ္တိ ဗျတ္တိ လညာတ် ညးကဵုညး ဂယိုၚ်တဴလမျီု သွက်ဘဝဇကုမွဲပ္ၚံက် ဂွံယးတၟးဍိုပ်ဍဴ ပ္ဍဲဂၠးကဝ်ဏံ ဗီုညးကဵုညး တဵုပယျေဝ်ဒၟံၚ် ၚုဟ်မးဘဝတုဲ သီုဟွံဒုၚ်ကျအခိၚ် ဘဝဂွံသၠုၚ်ပြဲ ပ္ဍဲဘုံမၞိဟ်ဂးတုဲ လ္ၚဵုပတှေ်ပညာ လ္ၚဵုစကာလိက်ပတ်အိုတ်ရ။
ညးဆာန်ပညာဂှ် ဘဝညးတံ ၜိုန်ဟွံလေပ်လိက်ကီုလေဝ် စကာကၠေၚ်က္ဍဟ် ချူဗဒှ်ဝၚ်ခိုဟ် စိုတ်ဓါတ်ပေၚ်ကၟိုဟ် ကၠိုဟ်ပရေၚ်ကေၚ်ကာကမၠောန် သွက်ဘဝညးကီု သွက်ဂကူကီု ရေၚ်တၠုၚ်ဏာ ကမၠောန် နတဲမာန် ပတှေ်ကေတ်ကၠေၚ်က္ဍဟ် ဇကုကဵုဇကုအိုတ်ရ။ “လ္ၚဵု” သွက်ဘဝညးတံဏံ ပညာဂှ် ဟွံဒးဗ္တောန်ကဵုညးတံမွဲသာ် အလဵုအလဵု သမ္တီညးကဵုတၚ်ရန်တၟံညး မံက်ဒှ်ကၠုၚ် ဂွံဆဵုကေတ်ရ။ လ္ပာ်ဒ္ဂေတ်ဝတ်မၞိဟ်လေဝ် တီကၠိုဟ်ကၠုၚ်၊ စေတနာလေဝ် ဗုအးလ္တူညးဂမၠိုၚ် သီုကဵုဒှ်အထိုၚ်အသး ဂွံဒုၚ်ယၟုခိုဟ် ပ္ဍဲစရၚ်ဘဝမၞိဟ် ဘုံလောကဏံရ။
က္လေၚ်ကျောဝ်အာ ဘဝညးတံညိမ္ဂး ထေက်ကဵုဒးအံသဝ်ရ။ ဘဝညးတံ ၜိုန်ဟွံလေပ်လိက်ကီုလေဝ် လညာတ်သမ္တီညးတံကဵု စရာဲဍာ်ဒ္ကေဝ်ညးတံ တန်ဒှ်ကၠုၚ်တုဲတုဲကီုရ။
ပ္ဍဲဂကူပိုဲ ညးလေပ်လိက်အောန်ဒၟံၚ်တုဲ အခါရချပ် ပရေၚ်ကမၠောန် ဖေါအ်ဗြေဝ်ဂကူမ္ဂး ခက်ခုဲကၠုၚ်ကဵု ညးလေပ်လိက်တံရ။
ရံၚ်ကဵုဂလာန်ဏံတုဲ က္ဍိုပ်သ္ကိုပ် တၠပညာ ခမဳသၚ် ညးဆာန်ဂကူဂမၠိုၚ်တံ သမၠုၚ်ပ္တိုန်ဒၟံၚ် ကွတ်ပညာ ဂလိုၚ်ပ္တိုန်ဒၟံၚ် ညးလေပ်လိက်တံ ပ္ဍဲအရာကမၠောန်ဂကူ မံက်ကၠုၚ်မ္ဂး ဒၞါဲညးကဵုညး ဒၞါဲအဲကဵုအဲ ညံၚ်ဂွံရေၚ်တၠုၚ်အာမာန် ဂိုတ်ဂစာန်ပ္တိတ်ကၠုၚ်ဇြဟတ် အနာဂတ်လမျီုဂကူ ဂွံတောတက်မာန် ပတဝ်ကၠုၚ် ဂၠံၚ်တရဴဏံအိုတ်ရ။
အကာဲအရာတ္ၚဲဏံ ဘာတန်ဗ္တောန်ကဵုပညာဂှ် မတ်ဍေံစုၚ် သမၠုၚ်ဒၟံၚ်လညာတ်ဘဝမၞိဟ်တုဲ လေပ်လိက်ဘာသာမိဇကုမှ တီကၠိုဟ်တဴ ရှ်သာဂကူ မိက်ဂွံဂး။ ယဝ်ဟွံလေပ်လိက် ဟွံလေပ်ပညာ ဇၟာပ်ညးတၞဟ်စကာ ဇကုဒးဒုၚ်ဇိက် ပၟိက်ဇကု ဒၞါဲလဵုလေဝ် အခေါၚ်ဟၟဲရ။
စိုတ်ဓါတ်မိမ လ္တူကောန်ဇာတ် ခေတ်ကာလတ္ၚဲဏံ ဟွံကဵုကောန်ကတ်ပညာဂှ်အောန်၊ ဇၟာပ်မိမ နွံပၟိက်ကဵုကောန်ဇကု ဍိုဟ်ကေက်၊ နွံပၟိက်ကဵုကောန်ဇကု လေပ်လိက်အိုတ်ရ။
ပ္ဍဲကဵုခေတ် အာဲ.ထဳ မံက်ဂတဝ်ဒၟံၚ်ဏံ ညးဂမၠိုၚ်ဟီုဒၟံၚ် ဂၠးကဝ်ပြံၚ်သၠာဲ၊ ဍာံဍာံတေံဂှ် တၠပညာသိပ္ပံ ညးလေပ်လိက်တံ သၠုၚ်ပ္တိုန်ဒၟံၚ်အဆံၚ်ဘဝမၞိဟ် သမၠုၚ်ပ္တိုန်ဒၟံၚ် အဆံၚ်လညာတ်သမ္တီ ကၠေၚ်က္ဍဟ် ပိုဲမၞိဟ်တံရ။ ဇၟာပ်ပိုဲမၞိဟ်တံ ပရေၚ်ပြံၚ်သၠာဲ ကၠေၚ်က္ဍဟ်ဂှ် မံက်ဂတဝ် ဗီုညးကဵုညးအိုတ်ရ။ (ပြဟ်မြက် ဂတာပ်အခိၚ် ဂတာပ်စိုတ် ဟီုဂးတဴအိုတ်)။
ညးလေပ်လိက် ကေုာံ ညးဟွံလေပ်လိက် ကၠောန်ဒၟံၚ်ကမၠောန် စကာဖုၚ်၊ ကမၠောန်နာနာ ၜိုတ်ဓမ္မတာပြေပြံၚ်၊ စနူကောန်ၚာ် မွဲသၞာံပြၚ်ၚ်ဂှ် ဝေၚ်ဂိမ်-ပဠောံဖုၚ် လေပ်ကၠုၚ်အိုတ်ရ။ အကြာဂှ် မိမ မွဲကဵုမွဲလေဝ် အထေၚ်ဇၞော် ဟီုထ္ၜကောန်ဇကု ထိုၚ်သးမိပ်သၠောၚ် လအ်ကၠုၚ် ဂွံအယုက် ၜိုတ် (၅) သၞာံပြၚ်ၚ် ကဵုကောန်မံၚ်ဘာ အခါဂှ် မိမတံ ဒှ်ကၠုၚ်ပရေၚ်ခက်ခုဲ (တၚ်ကော်ဆော)ကဵု ကောန်အိုတ်ရ။
ကောန်ဂှ်မံၚ်ဒၟံၚ်ဘာဟီုကၠာရလေဝ် လ္ပာ်လိက်ဂှ် ဟွံစောဲလာံကွေံကွေံရ။ တီဆမိပ် ချပ်ဒၟံၚ်လ္ပာ်ဖုၚ် အပ္ဍဲသ္ၚိ၊ ကောန်ၚာ်ဂှ် ဂွံအယုက် (၁၀၊၁၅) သၞာံမ္ဂး တန်ဂှ် ၜိုန်သၠုၚ်တိုန်ကီုလေဝ် ဍာ်ဒ္ကေဝ်လိက်ပတ်ဂှ် နွံၜိုတ် (၃၀)တၟံကၠံ၊ အာရီုလ္ပာ်လိက်လေဝ် အောန်စှေ်ကၠုၚ်၊ စဴကၠုၚ်နူဘာ စိုပ်သ္ၚိမ္ဂး ဒးက္လအ် ဒးလ္ၚောဝ်မိမ၊ ဒးသၟးဇ္ၚး ပ္ဍဲသ္ၚိဏောၚ်ဂှ်သ္ၚောဲ ဝိုတ်အာအိုတ်ရ။
စိုပ်သ္ၚိမ္ဂး ဖုၚ်ဂှ် ဒးရပ်ကၠာဏောၚ်၊ ဟီုမွဲဗီုပၠန်မ္ဂး ဒှ်ဂဥုဲစိုတ်ဓါတ်ဇၞော်ဇၞော်မွဲ၊ ကမၠောန်တၞဟ် ကပေါတ်တၞဟ် ဝိုတ်အာကီုလေဝ် လ္ပာ်ဖုၚ်ဂှ် ဟွံဝိုတ်ရ။ လအ်ကၠုၚ်မ္ဂး လိက်ပတ်ဂှ် စိုပ်အာအဆံၚ် တက္ကသိုလ်တုဲ (တိုန်ဒဵုကၠဇျှာ် စှေ်ဍာ်ကျာံကိတ်) သၟိၚ်လိက်ပတ် ကျာ်ဇၞော်ပါလိတ ဟီုတွံလဝ် ကြက်ဂလာန် ပရေၚ်ဍုၚ်ကွာန် ပ္ဍဲဂကူပိုဲရ။
ကောန်လ္ၚဵု ယဵုဖျဴနၚ် တဆိပ်ကြာ (ဘွဲ႔) သၠထဝ် သၠသြန်၊ ကောန်လ္ၚဵုပၠန် ဟွံအံၚ်တုဲ မိမစိုတ်လီု၊ ကောန်ဂှ်စိုတ်ပြး၊ လညာတ်မိမဂှ် မိက်ဂွံကဵုကောန် အံၚ်လိက် အဆံၚ်သၠုၚ်၊ မိမ ၜိုန်ဒုၚ်ဒဒိုက် ဇက်လဝ်ပ္ကဴသြန် သ္ၚိညးတၞဟ်ကီုလေဝ် စိုတ်ဓါတ် ကဵုကောန်ကတ်ပညာဂှ် နွံဒၟံၚ်တွဵုရ။ “ကျမွဲလ္ပဒုၚ်ဝၚ် ရေၚ်တၠုၚ်ကေတ် ပရေၚ်အံၚ်ဇၞးတွဵု ပၠုပ်လမျီုစိုတ်ဓါတ် သွက်ကောန်တုဲ ဇၟာပ်ညးပ္ဍဵုပ္ဍိုက်ဇကု ဇကုဟွံဒှ်ဒဒိုက်၊ တသိုက်ဂှ် ရေၚ်တၠုၚ်မံၚ် သွက်ဘဝကောန်တံရောၚ်၊ မိမဂှ် စၞောန်ပၠလဝ် ဂၠံၚ်တရဴမေတ္တာ သိက္ခာ လ္တူကောန်လၟိုန်ရ။
ကောန်ကဵုတသိုက်တံဂှ် ဒၠေၚ်မိမဇြိုၚ်ၚ် ကောန်ဒုၚ်ယိုက်ဂၠေၚ်ကေတ်တုဲ ကၟောန်ဂစာန် ဒဵုကဵုဝတ်တာလျိုၚ်ပြေ၊ ကောန်တီဂုဏ်ဗီုဏံဂှ် မိမဂွံတသိုက်၊ တာလျိုၚ်ဘဝကောန် ပ္ဍဲသ္ၚိကၟိန်ပိုဲဏံ ပြေပြံၚ်မ္ဂး နကဵုဆန္ဒကတိပါၚ် ပါကၠုၚ်နူဂဝ်ဂၞဴမိ ညိဆီဟွံပြံက်နှဴ တာလျိုၚ်ဂကူလေဝ် လုပ်ယိုက်ဂၠေၚ် ရေၚ်တၠုၚ်မာန်ကီု၊ ဒုၚ်ယဵုကေတ်လဝ် သွက်ဂကူတုဲ၊ မိမမိပ်စိုတ် သၠောၚ်သပဝ် ထိုၚ်သးလ္တူကောန်ကီု အလုံဂကူမန်ပိုဲလေဝ် ထိုၚ်သးကေတ်ဂုဏ်စရာဲရ။
မၞိဟ်မ္ဂးဂှ် တၚ်ပ္တဝ်က္ဍိုပ်ဇကု ကဵုလညာတ်စိုတ်ဓါတ်ဂှ် ဒှ်အဓိကဏောၚ်၊ ကမၠောန်မွဲမွဲ ဇကုချပ်လဝ် နကဵုလညာတ် ပတဝ်လဝ်က္ဍိုပ်ကဵုကမၠောန် စိုတ်ဓါတ်ဇကု ကၟောန်ခိုၚ်ဗိုန်မ္ဂး လ္တူကမၠောန်ဂှ် ဆဵုအာသွဟ်ဍေံ အံၚ်ဇၞးရောၚ်။
မၞိဟ်ကော်ဆောကဵုဇကုလေဝ် အလဵုအလဵု စေတနာဍေံ ကဵုဖဵုကုဍေံရောၚ်။ တၚ်ရန်တၟံဇကု ဟွံတၞဟ်ခြာအာ နူလညာတ် စိုတ်ဓါတ်ဇကုမ္ဂး ပရေၚ်ဒးဒုၚ်ဂိ ပ္ဍဲကမၠောန်မွဲမွဲဂှ် ဒှ်အ္စာကၠာရ။ ဇကုဂှ် ဒှ်ညး ဒးဒုၚ်သ္ပဂၞန်ကၠာရ။ ပရေၚ်အံၚ်ဇၞးဘဝဂှ် အာၜှ်ပလှ်ကေတ် ညံၚ်ခၞေဝ်ကေဝ်၊ အာဗာ်ကေတ် ဗီုၜၚ်ဍုန်သွ ဂွံဟွံသေၚ်၊ ဇကုဇကု ဒးပြေၚ်လဝ် မအက္ခရ်စိုတ်ဓါတ်ဇကုရ။
အဃောဘဝဇကု တၞးကၠေၚ်ခၟောံဇဝ် ညးတၞဟ်ကၠဟ်နၚ် သတ်အရေဝ် ‘ကၠာ်’ အကြာဂှ် ဒးဗ္စာ ဒးတီလဝ်ထေက်၊ ဇၟာပ်ပၟတ်ညးတၞဟ်ဗဂဵု ဇကုလ္ပဂဵုဗက်၊ ညးပလီုဘဝသိက္ခာဇကုဂှ် မၚ်ဒုၚ်တၠုၚ်မံၚ် စိုတ်ဓါတ်ပိုဲရ။ ပ္ဍဲလောကဏံ အလုံမၞိဟ်ဖအိုတ် ဂွံဒှ်စိုတ်မွဲဂှ် ဒှ်ဟွံမာန်ရ။ ဇကုဆာန်ကမၠောန် အဓိကမွဲမွဲမ္ဂး ကမၠောန်ကဵုဖဵု သွက်ဘဝဇကု ဂွံဇၞော်မောဝ် ညးဂမၠိုၚ်လေဝ်ထိုၚ်သး မိမ က္ဍိုပ်သ္ကိုပ် တၠပညာတံလေဝ် ထိုၚ်သး ကောန်ကဵုတသိုက်စိုတ် လ္တူဂကူ လ္တူမိမဂှ် ဒှ်ဇြဟတ်ဂကူ ဗွဲမဇြိုဟ်နက်ရ။
ကောန်ဟွံကဵုတသိုက်တံဂှ် နူဘဝကောန်ၚာ် ဟွံအံၚ်လိက်၊ ပၟိက်ကောန်ဂှ် စိုတ်ဓါတ်ပြံၚ်၊ ကၠောန်ဣဏံဂှ် ခိုဟ်ဟာ၊ ကၠောန်ဣတေံဂှ် ခိုဟ်ဟာ၊ ဂွံပံၚ်ကဵုရဲဇကု မဂွံလဝ် တဆိပ်သၠထဝ် သၠသြန် ပၠန်လေဝ် ဂွတိုန်ပ္ဍဲစိုတ်ဇကုတုဲ စိုတ်ဇကုဂှ် ဒးစံၚ်တူမံၚ်ပြး ထိၚ်ဟွံမာန် ဒှ်လေပ်ရ။ လ္တူမိမတၠပညာတံ ဂွိၚ်ကဵုဘဝမၞိဟ်မွဲမွဲ ဆောံလေၚ်တုဲ နကဵုစေတနာ မိက်ဂွံကဵုခိုဟ်စ သွက်ဘဝ အလဵုအလဵုစိုတ်ဇကုဂှ် သာဲအာနူကဵုမိမ အ္စာ သ္ကံရဲ အိုတ်ရ။ (စိုတ်ဇကု ဍေံဒှ်ဒၟံၚ် မၞိဟ်ပံၚ်စိုတ်သာ မိက်ဂွံဂး) ရ။
ကမၠောန်ခိုဟ် ညးဂမၠိုၚ် ကဵုနၚ်ကသပ်ဂှ်ပၟိက်အောန်၊ ကမၠောန်ပရေံဂှ် ပၟိက်ဍေံ အလဵုအလဵု မံက်ဒှ်ကၠုၚ်ရ။ လ္ပာ်ပရေံဂှ် မၞိဟ်တံၜိုန်ဟွံဆာန်လေဝ် ဍေံတန်ဒၟံၚ် ပ္ဍဲစိုတ်ခန္ဓပိုဲမၞိဟ်တံရ။ ကမၠောန်ခိုဟ်ဂှ်လေဝ် မၞိဟ်တံၜိုန်ဟွံဆာန်လေဝ် ဍေံတန်ဒၟံၚ် ပ္ဍဲခန္ဓစိုတ်ပိုဲမၞိဟ်တံဖအိုတ်ရ။ ပွဗၠေတ်တ်ဂှ် ညးတၞဟ် ဟွံဒးဗ္တောန်ကဵုမွဲသာ် စိုတ်ဇကု ယိုက်လေပ်အိုတ်ရ။
ဇၟာပ်ညး ဟီုခိုဟ်ပရေံ ဟွံဗ္စာတုဲ ကၠောန်ဒးတုဲမ္ဂး မိမတံ ဒှ်ဒဒိုက်စိုတ် လ္တူကောန်ပၠန်ရ။ မိမတံ လျိုၚ်ဇြိုၚ်အိုတ် လ္တူကောန်ဇာတ်ဂှ် သိက္ခာဘဝပၠိုတ် ဇၞော်အိုတ်ရ။ ဇၟာပ်မိမ အာကၠုၚ် ညးတၞဟ် ဟီုပရော စောဒက လ္ပာ်ကောန်ပရေံ မိမဂွ စိုတ်ဂှ်ဟွံဒှ်တသိုက်ရ။
ပ္ဍဲလောကဏံ (ဂွ,ဖေက်,စိုတ်လီု) ဣဒ္ဓိဍေံဇၞော်အိုတ်ရ။ ကုညးရေၚ်တၠုၚ်ဒၟံၚ် ကမၠောန်ဘဝ ကမၠောန်ဂကူပိုဲအိုဿီုဂှ် လ္ပကဵုဒးဆဵုညိ။ တတ်ထပါ်အာ ဂံၚ်ၚ်ညိ။ ဇကု ၜိုန်ဟွံလေပ်လိက် ဟွံလေပ်ပညာ ကၠာလေဝ် တတ်ထပါ်အာဂံၚ်ၚ် လ္ပယံၚ်၊ ခေတ်ဏံဂှ် ဟီုဒၟံၚ် အာဲထဳ ဂတာပ်ဒၟံၚ်ခေတ်ဟေံဂှ် ဇကုစကာလေပ်မှ ဂတာပ်ခေတ်၊ သၟတ်တံလေဝ် ဂတာပ်ခေတ် ဟီုဒၟံၚ် ဆဵုဒၟံၚ်နမတ်အိုတ်ရ။ (သီုဖအိုတ်ဟွံသေၚ်)။ သၟတ်တံ ဟီုဒၟံၚ် ရမျှာၚ်ဆာန်ဂကူ လ္တူကျာဂှ် ကေတ်တဴဂုဏ်စရာဲရ။
သၟတ်လ္ၚဵု ဝိဝိၚ်ကဵု ဂဥုဲၜူမာဲတုဲ ဟီုဒၟံၚ်စိုတ်ဓါတ်ဆာန်ဂကူ- ဂဥုဲဂၟာဲက္ဍဟ် လုပ်ဂွံပ္ဍဲခန္ဓတုဲ ကြောဒၟံၚ်ပ္ဍဲဂၠံၚ် ရံၚ်လာၚ်ဖုၚ်တုဲ ပစူတဲ အတိုၚ်အရေဝ်ဍေံ ပၟိက်စိုတ်ဍေံ၊ ဆဵုညးတၞဟ်ကၠောန် ပရေၚ်ဂကူမ္ဂး ဇကုဇြိုၚ်စိုတ် ဒးဘိုၚ်ကဵုဇြဟတ် သွက်ဂကူဂှ် ဇကုဟွံရေၚ်တၠုၚ်၊ အထေၚ်သောဲကဵု ညးအာဂတ ကမၠောန်ဆာန်ဂကူဂှ် ဒှ်ကမၠောန်ဍာံရဟာ။
တၚ်သၠေဟ်ပၟာစိုတ်ဇကုဂှ် ညာတ်ကၠုၚ်လ္တူညးရ။ ဟီုဒၟံၚ်ဟွံတီပိၜါ ဗြုဒၟံၚ်ညံၚ်ဗုံဂှ် ဒှ်ညးပၠေၚ် ဘဝဂကူ ဒှ်ညးပလီုဘဝမၞိဟ်မွဲဏောၚ်၊ ဒၟါနူဇကုလီုအကြာဂှ် က္ဍိုပ်သ္ကိုပ်တ္ၚဲဏံ ကဵုမိမတံ လ္ပကဵုဒးချပ်ညိ။
အရေဝ်ဏံ ဟီုဟွံတုဲ မိမကၠုၚ်ပအပ်ကောန်ဇာတ်၊ ကောန်ကၠုၚ်ပအပ်အပါ၊ က္ဍိုပ်သ္ကိုပ်တံ ဒးထိၚ်ပၠန်ရ။ ရဲတံဏံဂှ် မၞိဟ်တီကၠိုဟ် ပရေၚ်ဂကူ၊ ညးလေပ်လိက် လေပ်ပညာတုဲ ဇကုဍေံ ဍေံလီုဟွံလေပ်၊ အထေၚ်ဇၞော်ကဵုဇကုဍေံ အိုတ်ရ။ (မၞိဟ်လီု မၞိဟ်လီု လီုဗီုနစာ်ဟွံသေၚ်) ဘဝဇကုဂှ် သ္ပတၟေၚ်တုဲ အိုတ်ကၞောတ်မှာဂှ် က္လေၚ်ဒုၚ်ဂုဏ်ဟွံဂွံရ။
လေပ်လိက် လေပ်ပညာ ဇကုအဲ အဲဒးပါ်ပါဲကၠာရ။ လေပ်လိက်ဂှ် ပၟိက်ဍိုက်ပေၚ် ဟီုကၠာလေဝ် ဂွံလဝ်တဆိပ် ဒဳဂရဳ ဍောတ်ဇၞော် ကွက်ထ္ၜးလဝ်ပ္ဍဲဗ္ဒၚ်၊ က္လေၚ်ရံၚ်ဘဝမ္ဂး ၚုဟ်မးဟွံသၠုၚ် ဒုၚ်ဒဒိုက်တုဲ လုပ်ဒၟံၚ်ပေါဲဗ္တိုက်ကဵု ဂဥုဲၜူမာဲ၊ ဖအိုတ်အခိၚ်ဘဝတုဲ ဂံၚ်ပြိုၚ်ကၠုၚ်၊ လ္ပာ်ဂကူလေဝ်ဟွံချပ် လ္ပာ်ဘဝလေဝ်ဟွံညာတ် ကဵုဒၟံၚ်ဒဒိုက်စိုတ် လ္တူမိမ က္ဍိုပ်သ္ကိုပ်တံဂှ် ဂွံဆဵုကေတ်ဂၠိုၚ်ရ။
မိမတံ ဝေတ်ဗ္တောန် ခိုဟ်ဟ်လေဝ် ဟွံပၠုပ်ပ္ဍဲက္ဍဟ်၊ ဗီုစိုတ်ဇကုဒှ်ရ ဇကုဗလးဏာဂှ် ဒှ်ဘဝမၞိဟ်မွဲတုဲ ပရေၚ်ပရေံပရေံဂှ် ဂစာန်ဆာန်ဂၠိုၚ်တုဲ လ္ပာ်ခိုဟ် အရၚ်ညးဂလိုၚ် ဂွံဒှ်တသိုက်ဂှ် ဂၠာဲဟွံလေပ်၊ ပၞော်ဂၠံၚ်ဇကုဂှ် ညာတ်ဒၟံၚ်အတ္တကဵုအန္တရာဲရောၚ်။
ရုပ်နာံဇကု ၜိုန်ဂျိုၚ် ၜိုန်ဍိုက်ပေၚ်ကဵု လက္ချှန်မၞိဟ်ကီုလေဝ် ဒ္ဂေတ်ပွ သိက္ခာဇကုဂှ် ဒတုံစှေ်ဒၟံၚ် သၟဝ်ဂၠးဂတာဇိုၚ် ညးတၞဟ်အိုတ်ရ။ ၜိုန်ဂျိုၚ်တဴကဵုဘဝမၞိဟ်ကီုလေဝ် မုဟွံတၟေၚ်၊ ၜိုန်မှာလဝ် ဆဇကုမွဲကၠာလေဝ် ညးဂမၠိုၚ် ညံၚ်ဟဂွံမှာဗက်ဂှ် ဇကုဇကု ထေက်ကဵုဒးတီကေတ်ကၠာရ။
ဇကုလေဝ်တၠပညာ ညးလေပ်လိက်မွဲ မၞိဟ်ကၠိုဟ်ပရောပရာမွဲ၊ အနာဂတ်ဂတတေံတၟးဂှ် ဇကုတီညာတ် ကၠာနူညးတၞဟ် ကမၠောန်ကဵုဖဵုပၠန်လေဝ်ဇကုတီ၊ ကမၠောန်ကဵုအန္တရာဲ သွက်ဘဝဇကု သွက်ဂကူဇကုဂှ် ဝေၚ်ပါဲဒး အရာအရာအိုဿီုဂှ် ပြဟ်တီ ဇိပ်ဂၠိပ် တၟးကေဝ် ပ္ဍဲစိတ္တညာဏ်ဇကုတုဲ လ္ပဖအိုတ်အခိၚ်ကဵုဂဥုဲပလီုက္ဍဟ်၊ ချူဗဒှ်ဝၚ်ခိုဟ် ဝၚ်ပြဲ ပ္ဍဲဂကူဇကုတုဲ ဇကုလေဝ် ညးလေပ်လိက် အဆံၚ်သၠုၚ်မွဲရတှေ် ဇကုဇကု ဒးဗ္စာကေတ်တ်ရ။
ညးလေပ်ပညာဂှ် ၜိုတ်ဇြဟတ် အစောံစရာဲညးညာတ်လေဝ် ဂစာန်ဂါံအာဒၟံၚ် လၟေၚ်ၚ်တုဲ ညးလေပ်လိက်လေဝ် အဃောပညာကေက် ၚေက်ကၞေဟ်ဂြိပ် သၠဒ္ကေဝ် ပၟိက်ဂကူညဳသာမ္ဂး ကမၠောန်ဂကူ တော်တက် တ္ၚဲယးရ။
ယွံမန်တံ ခံက်တဲဗန်ကအ် တာလျိုၚ်ပိုဲတ္ၚဲဏံ လ္ပရံၚ်ဗဵု ဒၞါဲခလံက်ဂှ်ဗဝ် ဒၞါဲသဝ်ဂှ်သမၠုၚ် ဒုၚ်ကေတ်တာလျိုၚ် ဂကူနွံကဵုနန် ယၟုမန်မွဲမစိုအ်။
