သွက်ဂွံက္လေင်ကဵု ဍုင်ကျာ်ပိ မၞုံဒေသပယျဵု သေံ-ဗၟာဂှ် နူကဵုသ္ကိုပ်ပၞာန် ဒပ်ပၞာန်ဗၟာ ယျေဝ်ဝေန်ဥု အာတ်မိက်ဟီုဂးကၠုင်ကု ဂကောံရပ်လွဟ်ကရေင် ကေအေန်ယူကဵု ဒဳကေဗဳအေ တံ ဂွံမရနုက်ကဵု (၂) ဝါရောၚ် တမ်ရိုဟ်ပရိုင်ဒေသ လဴထ္ၜးကၠုင်ရ။
“တုဲကၠုၚ်သၞာံ (၂၀၂၅) ဂှ် မွဲဝါ၊ လၟုဟ် သၞာံ (၂၀၂၆) မွဲဝါပၠန်တုဲ ဒှ်အာ (၂) ဝါရ။ ဆဂး နူကဵုစၞောန်ဒပ်ပၞာန်တံ လလောၚ်ပ္တိတ်ဂှ် ဟွံဂွံဆဵု၊ ဟွံဂွံမိၚ် ချိုတ်တ်ပၠိုတ်တ်ဏီ၊ တုဲပၠန် နူကဵု ကေအေန်ယူ, ဒဳကေဗဳအေ တံလေဝ် နူပၞာန် ကလေၚ်အာတ်ဂှ် သ္ပလဝ်ဒတန်ဟွံမွဲဏီရောၚ်” သာ်ဝွံ ညးပါလုပ်မံင် ပ္ဍဲဂကောံအုပ်ဓုပ်အရာပ် လ္တူဍုင်ကျာ်ပိမွဲတၠ ဟီုရ။
ၜိုန်ဂှ်လေဝ် ကိစ္စဒပ်ပၞာန်ဗၟာ အာတ်မိက်ကၠုင်လဝ်ဏံဂှ် အကြာဂကောံရပ်လွဟ် မချဳဒရာင်ဒၟံင် ဒေသပယျဵုကျာ်ပိတံ ဒးက္လေင်သဳကၠဳပ္ညဳပ္ညပ်ညးသ္ကအ်တုဲဒှ်အိုတ်မှ ဖျေံသ္ဂုတ်သွာတ်ဂွံမာန်ဏောင် ညးတီပရူဒဒှ်မွဲတၠ ဟီုလဝ်နွံကီုရ။
တုဲပၠန် နူတမ်ရိုဟ်ပရိုၚ်စုက်လုက်ကဵု ဂကောံရပ်လွဟ် ဒဳကေဗဳအေ မွဲတၠဟီုဂှ် ပ္ဍဲဒေသပယျဵု လ္ပာ်သ္ကုတ် ဗြဝတဳတေံဂှ် ဒပ်ပၞာန်ဗၟာတံ ဂ္ဇံအုပ်ဓုပ်ဖန်ဇန်တန်တဴဒၟံၚ်နွံတုဲ လ္ပာ်သ္ကုတ်ဒေသပယျဵုဍုၚ်ကျာ်ပိဏံလေဝ် နူဒပ်ပၞာန်ဗၟာတံ ညံၚ်ဂွံကလေၚ်အုပ်ဓုပ်မာန်ဂှ် ဂ္စာန်ဒၟံၚ်ရောၚ်။
ဒှ်သာ်ဂှ်ရ လဂွံကဵုပရိုင်မမံက်ဒၟံင်ပြဟ်ဟ်ဏံမ္ဂး လ္ပာ်ဒပ်ပၞာန်ဗၟာ ပလေဝ်လဝ်ဇြဟတ်ကရောင်ပၞာန်တိုက် သွက်ဂွံဇက်တိုန်ဍုင်ကျာ်ပိ နူဂၠံင်ရေဝ်-ကျာ်ပိ၊ ဇြပ်ဗု-ကျာ်ပိကဵု လှာဒကှ်-ကျာ်ပိနွံ ဂးရ။
“ဂွံဆဵုကေတ် လ္တူဍုၚ်ကျာ်ပိ ပြဟ်ဟ်လၟုဟ်ဏံဂှ်တှ်ေ ဂကောံရပ်လွဟ် ဒဳကေဗဳအေ တံရ ပတေၚ်လဝ်ဂီုကၠီု တ္ၚဲကီု၊ ဗ္တံကီု ဇၟာပ်အရာပ်၊ ဇၟာပ်ဒၞာဲ ပေၚ်ဒၟံၚ်နွံရောၚ်” သာ်ဝွံ ညးဍုင်ကျာ်ပိမွဲတၠ ဟီုရ။
ဍုၚ်ကျာ်ပိဂှ် စနူသၞာံ (၂၀၂၃) တေံ ဒပ်ပၞာန်ဗၠးၜးကောန်ဂကူကရေင် ကဵု ဒပ်ပံၚ်ကောံဂမၠိုၚ် လုပ်ဗ္တိုက် သီဂွံတုဲ စက်ယန်ဒပ်ပၞာန်ဗၟာ မဂေတ်ဒၟံၚ်လ္တူဍုၚ်ကျာ်ပိဖအိုတ်ဂှ် ၜိုန်ရဒးဒေါံဇူအာနွံကၠာလေဝ် နူကဵုဂကောံရပ်လွဟ် ဒဳကေဘဳအေမွဲအဆံင် ဆက်ဂွံဒၟံင်အကံက်အခေါန်လၟေင်ဂိတုနွံရောင် တမ်ရိုဟ်ပရိုင်ဒေသတံ လဴထ္ၜးလဝ်ဂှ် ဂွံတီကေတ်ရ။