ကပေါတ်ဗၞိက်ၚုဟ်ဂွံက္ဍၚ်ဂှ် ဒၟာနူဒးဒုၚ်အကံက် ကုဂကောံရပ်လွဟ်တအ်ဂၠိုၚ်ဂှ်တုဲ ညးဍုၚ်ကွာန်တအ်ဒးရာန် နကဵုၚုဟ်က္ဍၚ်က္ဍၚ်ရောၚ် တၠကွဳစက်ဇက်ဖ္ဍိုက်ကပေါတ် နူဗြဝတဳ-ဍုၚ်မတ်မလီုမွဲတၠ ဟီုရ။
ကပေါတ်အရပ်စပ်နာနာကီု၊ ကပေါတ်ဗၞိက်စၞစသုၚ်နာနာကီု ပ္ဍဲဒေသဍုၚ်မန်ဂှ် သ္ဒးသ္ပပဓာန်ဒၟံၚ် ပယျဵုဗြဝတဳကဵု ပယျဵုကျာ်ပိဂှ်တုဲ ကပေါတ်ဗၞိက်တအ်ဂှ် ဒၟာနူဒးဒုၚ်အကံက် ကုဂကောံရပ်လွဟ်တအ်ဂၠိုၚ်ဂှ်ရ ညးဍုၚ်ကွာန်တအ်ဒးရာန် နကဵုၚုဟ်က္ဍၚ်က္ဍၚ်ရောၚ် တၠကွဳစက်ဂှ် ဟီုရ။
“ပိုဲရာန်နၚ်ကၠေၚ်စမွဲဖာ ဥပမာ ၚုဟ်နွံ (၁၀၀၀၀၀) တှေ်၊ ကပေါတ်ဂှ် ဂွံစိုပ်ဍုၚ်မတ်မလီုတှေ် ဒးဒုၚ်အကံက် အကြာသၞေဟ်ကၚ်ဂကောံရပ်လွဟ်ဂမၠိုၚ်တအ်ဂှ် တော်ဖအိုတ်တှေ် ဒတုံအဇာ ၚုဟ်ရာန်နၚ်ကပေါတ်ဂှ်ကီု ၜိုတ်အကြာ (၁၀၀၀၀၀) ဂှ် အိုတ်မံၚ်ဏောၚ်၊ ကၠေၚ်မွဲဖာ (၁၀၀၀၀၀) ဂှ် ဒှ်အာ (၂၀၀၀၀၀) တှေ် ရဲသွံရာန်ဂှ် ဍေံဒးတော်သီုခရိတ်ဖအိုတ်တှေ် ၚုဟ်ကၠေၚ်နူတမ် မွဲကဳလိုဝ် (၅၀၀၀) ဂှ် ဒးတော်သီုခရိတ်အကံက် ခရိတ်ဇက်ဖအိုတ်တှေ် ဒှ်အာ (၁၀၀၀၀) ဒှ်မံၚ်” သာ်ဝွံ နာဲ ဃာၚ်ထောန် (ဗလေတ်လဝ်ယၟု) တၠကွဳစက်ဒမြိပ်ဇက်ပလံၚ်ကပေါတ်ဂှ် ဟီုထ္ၜးရ။
ပယျဵုဗြဝတဳကီု၊ ပယျဵုဂၠံၚ်ကျာ်ပိကီုဂှ် ဂကောံပၠန်ဂတးကရေၚ်ဂမၠိုၚ်၊ ဂကောံပၠန်ဂတးမန်ဂမၠိုၚ်၊ ဒပ်ပၞာန်ဗၟာဂမၠိုၚ်၊ သၞေဟ်ကၚ်ဗၠာဲသၟိၚ်ဂမၠိုၚ် နွံလၟိဟ်ကဵုစှော်တုဲ သၟာကူသာန်သွံရာန်-တၠကွဳစက်ဇက်ဖ္ဍိုက်ကပေါတ်တအ် ဒးဒုၚ်ကဵုဒၟံၚ်အကံက် ကုဂကောံရပ်လွဟ်တအ် ဇၟာပ်ပ်ဂကောံရ။
“ဂၠံၚ်ဗြဝတဳကီု ဂၠံၚ်ကျာ်ပိကီုဂှ် ဂကောံပၠန်ဂတးကရေၚ်၊ ပၠန်ဂတးမန်၊ ပၠန်ဂတးဗၟာ၊ ဒပ်ပၞာန်ဗၟာ၊ ဒပ်ဗၠာဲသၟိၚ် နွံမံၚ်ဖအိုတ်ရ၊ ဒၞာဲညးဒၞာဲညး ဗက်မံၚ်ကရိုက် သၞောဝ်ညးကဵုညးဖအိုတ်ရ၊ ဗီုကဵုဒပ်ပၠန်ဂတးလ္ၚဵုဂှ်တှေ် သီုကဵုဗက်မံၚ် အကံက်လၟေၚ် သၞာံ (နှစ်စဉ်ကြေး) ကွဳစက်သၠာ (၆) မွဲမမူစိ၊ ကွဳစက်သၠာ (၁၀) မွဲမမူစိ ဂၠိုၚ်ကွေံကွေံ၊ ဗီုကဵုရဲအဲမွဲဂှ် ဂၠံၚ်ဗြဝတဳခက်ခုဲတှေ် အာဇက်မံၚ်ကပေါတ်ဂၠံၚ်ကျာ်ပိ ကဵုသၠာ (၁၀) ဍေံတော်စမ်ရံၚ် ဖ္ဍိုက်ကပေါတ်မွဲလတုန်တှေ် ခရိတ်ဂုက် (သၞေဟ်ကၚ်) သၟးဂှ် အိုတ်ဗ္ဒာဲ (၁၀၀) ကိုဋ်ဒှ်မံၚ်” သာ်ဝွံ တၠကွဳစက်ဒမြိပ်လာၚ် ဂၠံၚ်ဇြပ်ဗု-ကျာ်ပိ မွဲတၠဂှ် ထပ်ဟီုထ္ၜးရ။
ဍုၚ်မန်ဂှ် မပ္တံကဵုကပေါတ်အရပ်စပ်နာနာဂှ်ကီု၊ ကပေါတ်စၞစသုၚ်နာနာသာ်ဂှ်ကီု သ္ဒးပဓာန်ဒၟံၚ်ကဵု ဗၞိက်ဖျာဍုၚ်သေံတုဲ ရဲကူသာန်သွံရာန် ပတိတ်ကပေါတ်တအ်လေဝ် ဗီုဂွံဂှ် ရာန်ပတိတ်၊ ဇက်ပတိတ်ဒၟံၚ်ကပေါတ် နကဵုအကံက်အခေါန် ဂၠိုၚ်ဂၠိုၚ်ဂှ်အိုတ်ရ။
လၟုဟ်မ္ဂး သ္ပဟိုတ်နူကဵု သၟိၚ်တၠအဝဵုတအ် ကၟာတ်ဓရတ်လဝ် ကပေါတ်တိတ်နူပယျဵု ဗွဲမတေၚ်ဂြတ်ဂှ်တုဲ သၟာကူသာန်သွံရာန်ပတိတ်ကပေါတ်တအ် ဗီုပတိတ်ဂွံဂှ် သ္ဒးပတိတ်ဒၟံၚ်တုဲ သာတုဲ(ပဵုတုဲ)အကံက်အခေါန်ဂၠိုၚ်ဂှ်ရ ၚုဟ်ကပေါတ် က္ဍၚ်တိုန်ဒၟံၚ်ဖအိုတ်ရောၚ် ဂွံတီကေတ်ရ။