ဂိတုဂျူလာၚ် စၟတ်တ္ၚဲ (၁၂) နူတနေံဏအ် အခိၚ်ဗ္တမ် (၁၂) နာဍဳဂှ်ဝွံ ပ္ဍဲဍုၚ်ဇၞော်ၜၚ်ကံက်၊ ကၟိန်ဍုၚ်သေံ ဒၞါဲကဵုဆေၚ်စသုၚ် (ဗာ) “Rong Beer Na Ladprao”ဂှ် ဟိုတ်နူပၟတ်တူအာမွဲအသိၚ်ဓဝ်ဂှ်ရ မၞိဟ်ချိုတ်ဗ္ဒါဲ (၃၀) တၠ ကဵု ဒးဝပ် (၆၀) တၠပြၚ်နွံကၠုၚ်လဝ်ရောၚ် ဂွံဆဵုကေတ် ပ္ဍဲပရိုၚ်သေံဂမၠိုၚ်ရ။
မွဲအသိၚ်ဘဲဒဏ်ပၟတ်တူအာလဝ်ဂှ်မ္ဂး မၞိဟ်နွံမံၚ်ပ္ဍဲကဵုဆေၚ်စသုၚ်(ဗာ)တအ်ဂမၠိုၚ် ဂ္စာန်ဂြိပ်တိတ်ဟွံဂွံတုဲ မၞိဟ်ကၟာတ်မံၚ်ပ္ဍဲဂှ်ဗွဲမဂၠိုၚ် ပရေၚ်ဒးဘဲဝပ်ချိုတ်ဂျိုၚ်နွံကၠုၚ်ရ၊ ပ္ဍဲကဵုဂှ်မ္ဂး မၞိဟ်တြုံ မၞိဟ်ဗြဴ ဟွံအောန်နူ (၂၇) တၠ ကဵု မၞိဟ်ဒးဝပ် (၆၀) တၠလ္ပါ်လ္တူနွံကၠုၚ်လဝ်တုဲ နူကဵုဂကောံရီုဗၚ်မၞိဟ်သေံတအ် ဗွဲဂတာပ်အခိၚ် ကၠုၚ်စိုပ်ရီုဗၚ်ဟံၚ်ပြာ်တုဲ မၞိဟ်ဒးဘဲဝပ်ဗွဲမဂၠိုၚ်တအ်ဂှ် ပလံၚ်ဏာလဝ်ရုၚ်ဂဥုဲတေံနွံရ။
ဟိုတ်ပၟတ်သ္ဂောံတူအာဂလိုၚ်ဏအ်ဂှ်ဝွံ ပ္ဍဲကဵုဆေၚ်စသုၚ်(ဗာ)ဏအ် စကာမံၚ်ကပေါတ် ပၟတ်ကၠောံစိုပ် မြက်ဇက်မာန်နွံဂၠိုၚ်တုဲ နူကဵုဇုက်ပၟတ်ဓါတ်လလဳဂှ်မွဲတဆံၚ် က္တဵုဒှ်ကၠုၚ်လဝ်ရောၚ် ညးမဒှ်သ္ကိုပ်အုပ်ဓုပ် ဍုၚ်ၜၚ်ကံက် ‘’နာဲချာချာတ် သတဳဗန်’’ဂှ် ဟီုရ။
မွဲကရောံက္တဵုဒှ်အာလဝ်ဘဲဒဏ်ပၟတ်တူဂှ်ဝွံ နအလဵုသ္ကိုပ်ဝန်ဇၞော်ဍုၚ်သေံ နာဲ’’အနုဌိန် ချာန်ဝဳရဂုန်’’လေဝ် ကၠုၚ်စိုပ် ဘိုၚ်ရေၚ်တၠုၚ်ကဵု ကိစ္စပၟတ်တူအာလဝ်ဂှ်တုဲ ပရူဒဒှ်မၞိဟ်ဒးဝပ်ချိုတ်ဂျိုၚ်တအ်ဂှ်လေဝ် သာ်လဵုသ္ဂောံဆက်ဖန်အာပၠန်ရောဂှ် ညးပူဘိုၚ်သဳကၠဳလဝ်နွံကီုရ။
ပြဟ်ဟ်ဏအ်ဝွံ ညးအုပ်ဓုပ်ပွိုၚ်ဍုၚ် ကေုာံ ညးတာလျိုၚ်သေံတအ် ဂၠိုက်ဂၠာဲဓမံက်မံၚ်ပရေၚ်ဒဒှ်ဍာံဂှ်တုဲ စပ်ကဵုကိစ္စမၞိဟ်ချိုတ်ဂျိုၚ်တအ်လေဝ် သာ်လဵုဂွံပံက်အာဂဗုတ်မာန်ပၠန်ဂှ် ဆက်ဂၠိုက်ဂၠာဲမံၚ်ဖိုဟ်ရောၚ် ဂွံတီကေတ်ရ။
ဗီုရုပ် – Thai News