မယံင် (ဍုင်မန်)
အတိုင်ပ္ဍဲသၞောဝ်ဥပဒေယိုက်ဂၠေင်ပၞာန် တၠအဝဵုပၞာန်တအ်ဂှ်မ္ဂး ဇၟာပ်မၞိဟ်အဝဲပေင် (၁၈) သၞာံမ္ဂး ဒးယိုက်ဂၠေင်ပၞာန်ဖအိုတ်ရ။ ဆဂးဂှ် ပ္ဍဲကဵုတွဵုရး ကောန်ဂကူကောန်ဍုင်အရင်တအ်ဂှ် ဟိုတ်နူဒှ်ဂကူကောန်ဍုင်အရင်တုဲ နကဵုသၟတ်တအ် ဂွံလုပ်ယိုက်ဂၠေင်ပ္ဍဲဒပ်ပၞာန်ဗၟာဟီုဂှ် လောဲသွာမံင်ဟွံသေင်ရ။
ဟိုတ်နူဂှ်တုဲ ဒေသတွဵုရး ကောန်ဂကူကောန်ဍုင်အရင်တအ်ဂှ် ကၠောန်လဝ်ဓဝ်ပလိုဟ် ဒေသညးကဵုညးတုဲ ဖန်ဇန်ဒၟံင် ကိစ္စပကောံဒြဟတ်ပၞာန် ညံင်ဟွံဂွံကလိုက်ကမဵုရ။ တၠအဝဵုပၞာန်တအ် ရပ်လဝ်ဝါဒ လေံလေဝ်ညံင်ဟွံဂွံပိုတ် ဇြုံလေဝ် ညံင်ဂွံချိုတ်ရ။
ဗီုကဵုဒေသဍုင်မန်မ္ဂး ဗာ်မွဲဒကုတ် ပိုတ်ၜါဒကုတ်လေဝ် ဂွံဒှ်ရ။ စၞးသၟတ်မန်ဂှ် ကေတ်ဓဝ်ပလိုဟ် ကုညးတာလျိုင်မဆေင်စပ်တအ်တုဲ ကဵုဗက်ဩန်လိင်စုတ်မၞိဟ်စၞး ဂကူဗၟာတအ်ပၠန်ရ။ ကောန်ပၞာန်တၟိလေဝ်ဂွံ၊ စရင်လၟိဟ်မၞိဟ်(ဗၟာ)ပဵုလေဝ် ဒှ်ရ။
နဲဏံဂှ် အကြာမၞိဟ်တာလျိုင်တၠအဝဵုပၞာန်တအ် ဖန်ဇန်ကၠုင်ဒၟံင် ပေင်ပွိုင်ၜါသၞာံပြင်ကၠုင်ရ။ အပ္ဍဲကဵုမၞိဟ်တာလျိုင်တၠအဝဵုပၞာန် ကဆံင်လတူတအ်လ္ၚဵုတအ် ဖန်ဇန်ဒၟံင်နဲဏံဂှ် သ္ၚဳဂၠိပ်ကၠုင်နွံတုဲ သွက်ဂွံပြံင်ကၠောံအာ သၞောတ်သၞောဝ်အတိုင်ပ္ဍဲဥပဒေယိုက်ဂၠေင်ပၞာန် ဇၟာပ်မၞိဟ်ညံင်ဂွံတီတာလျိုင်တုဲ ညံင်ဂွံလုပ်ယိုက်ဂၠေင်ပ္ဍဲပၞာန်ဖအိုတ်ဂှ် ချပ်ဇန်ဒၟံင်လၟိုန်ရ။
သွက်သၟတ်မန်တအ် ကဵုကေတ်ဒၟံင်ဩန်တုဲ လိင်စုတ်ဒၟံင်မၞိဟ်စၞး နူဒေသတၞဟ်တၞဟ်တအ်ဂှ် လ္ပာ်ဂၠာဲပၞာန်ဂှ် ပြေပြံင်ကီုကၠာလေဝ် နကဵုညးဍုင်ကွာန်ဒုင်ကေတ်လဝ် ကောန်ဍုင်မွဲမွဲ ဂွံတီတာလျိုင်တုဲ ဂွံလုပ်ကေတ်တာလျိုင်ပ္ဍဲဒပ်ပၞာန်ဍုင် အတိုင်သၞောဝ်ဥပဒေဍုင်ဟီုဂှ် ဗၠေတ်ဗၠေင်ဒၟံင်ရ။
သၟတ်ညးဍုင်ကွာန်မန်တအ် ကဵုဩန်တုဲ လိင်စုတ်ဒၟံင်မၞိဟ်စၞးအတိုင်ဏံ ဗွဲလအိတ်ဂှ် နကဵုတၠအဝဵုပၞာန်တအ် စှ်ေစိုတ်ဟွံသေင်ရ။ မွဲအခိင် မွဲအခါ ဇၟာပ်သၟတ်မန် အဝဲစိုပ် (၁၈) သၞာံ ဒးလုပ်ကေတ်တာလျိုင်ယိုက်ဂၠေင်ပၞာန်ရောင်ဟီုဂှ် ရုန်ပါဲဝါတ်ကၠုင်ရ။
နူလၟုဟ်ဂှ် ပ္ဍဲဒေသဍုင်မန် တၠအဝဵုပၞာန်တအ် သၠုင်ပတိုန်အသိင်ကေတ်ကောန်ပၞာန်တၟိ နွံကၠုင်ရ။ ကေတ်ကၠုင်စရင် သၟတ်လုပ်အဝဲဒးယိုက်ဂၠေင်ပၞာန်တုဲရ။ ဇၟာပ်သၟတ်စရင်လုပ်အဝဲဂှ် ညံင်ဂွံဒးကေတ်တာလျိုင်ပၞာန်ဂှ် က္ဍိုပ်သ္ကိုပ်ပၞာန်တအ် ဖန်ဇန်ဒၟံင်အရိုဟ်ဒဒှ်တ္ၚဲရ။
ပ္ဍဲကဵုဖန်ဇန်ဏံဂှ် သၟတ်မန်တအ် ဟွံဒုင်တဲတုဲ ဖေက်လုပ်စိုပ်အာ ပ္ဍဲဂကောံပၠန်ဂတးတအ်လေဝ် တၠအဝဵုပၞာန်တအ် ဂွိင်ဒၟံင်နွံတုဲ ဆက်သုင်စောဲဒၟံင် ဗက်ဩန်လိင်စုတ်မၞိဟ်ဂှ်ဖိုဟ်ရ။ ဆဂး ဗီုကဵုဒေသလ္ၚဵုမ္ဂး ထ္ၜးဟိုတ်မွဲမွဲသာ်တုဲ ပါမ်မင်ရပ် ကေတ်သၟတ်တအ် အကြာဂၠံင်ဍာန်ဂှ်လေဝ် က္တဵုဒှ်ကၠုင်နွံရ။
ဗီုကဵုဒေသဍုင်ကၟာဝက်မ္ဂး တၠအဝဵုပၞာန်တအ် ကော်ပၠုပ်နင် ဂကောံဒပ်မင်ပယျဵု (BGF) တအ်တုဲ စကာကဵုမင်ကြတ်ရပ် သၟတ်တအ်အကြာဂၠံင်ဍာန်ရ။ ရပ်ဂွံသၟတ်တအ်တုဲမ္ဂး ပလံင်ဏာ ပ္ဍဲတမ်ဒပ်ပကောံကောန်ပၞာန်တၟိ လတူဍုင်မတ်မလီုရ။ မိမဂွံပရိုင်ဂတာပ်တဲဂှ် ကဵုဩန်ဂၠိုင်ဂၠိုင်တုဲ ဗၠးတိတ်နွံ၊ ဟွံဂတာပ်တဲမ္ဂး ဒးဒုင်ပလံင်ဗစိုပ်ဏာ ဒၞာဲတိုန်ဘာပၞာန်တၟိနွံရ။ ဗီုဏံဂှ် ဍုင်မန်ဒေသဇဳဒိုဟ် က္တဵုဒှ်ဒၟံင်နွံကီုလေဝ် ဆပရိုင်မံက်ကဵု ဟွံမံက်ရ။
သၟတ်ဍုင်မန်အဝဲစိုပ် (၁၈) သၞာံတအ် နွံလၟိဟ်ဂလိုင်လဵုဂှ် ကံက်လဝ်စရင်ချိုတ်ပၠိုတ် တုဲဒှ်ဒၟံင်အိုတ်ရ။ သွက်ဂွံဓမံက်ရုပ်ရဴဂှ် တၠအဝဵုပၞာန်တအ် ဖန်ဇန်ဒၟံင်ရ။ ပ္ဍဲကဵုဖန်ဇန်ဏံဂှ် ပံင်နှဴကၠုင် သီုကဵုဗက်ဩန်လိင်စုတ်မၞိဟ်စၞး၊ သီုကဵုဇကုသၟတ်တအ်ညံင်ဂွံပါ ဖန်စကာကၠုင်ရ။ ပ္ဍဲကဵုဇကုသၟတ်တအ် ညံင်ဂွံပါဂှ် တဲကၠာဏံ ဗက်ရပ်ကေတ် နကဵုဒုဟ်ဟိုတ်မွဲမွဲသာ် အကြာဂၠံင်ဍာန်ကၠာရ။
လလအ်ဂွံဓမံက်ရုပ်ရဴ ဇၟာပ်သၟတ်အဝဲစိုပ် (၁၈) သၞာံ ဒးလုပ်ကေတ်တာလျိုင် ယိုက်ဂၠေင်ပၞာန်ဖအိုတ်ဂှ် နကဵုသိုက်သိုက် ပၠုပ် ကၠုင်အစဳဇန် မွဲတုဲမွဲရောင်ဂှ် ဟွံဒးတော်ဗေဒင်ရ။ ဒှ်သာ်ဂှ်မ္ဂး သၟတ်အဝဲစိုပ်တအ် အာဂၠံင်လဵုရော တင်သၟာန်မံက်ကၠုင်ရ။
ရံင်ကေတ်ကဵု ဒဒှ်ပကတိသၟတ်တအ်လၟုဟ်ဏံမ္ဂး အာဍုင်သေံဟာ၊ လုပ်ယိုက်ဂၠေင် ပ္ဍဲဂကောံပၠန်ဂတးမန်ဟာ၊ ဒုင်ကေတ်အတိုင်အသံသၞောဝ်ဥပဒေ တၠအဝဵုပၞာန်တအ်တုဲ လုပ်ယိုက်ဂၠေင် ပ္ဍဲဒပ်ပၞာန်ဗၟာတအ်ဟာ မပ္တံ (၃) ဂၠံင်ဏံ သၟတ်တအ် ဒးရုဲစှ်ရ။
အခိင်ဂှ်မ္ဂး ဗက်ကဵုသၞောတ်ဍုင်မ္ဂး ဂွံဂြိပ်ပါဲဓလေတ်အာဍုင်သေံဂှ် မၞိဟ်ဂှ်ပါဲဗၠးလေဝ် မိမတန်တဴပ္ဍဲသ္ၚိတအ် ဒးဒုင်ကရေပ်ဂရတ်ချိုတ်ပၠိုတ်ရ။ အတိုင်ဂွံဆဵုကေတ် ပ္ဍဲကဵုလိက်စၞောန်ဍေံမ္ဂး မၞိဟ်ၜက်မံင်တရဴသ္ၚောဲဂှ် ကဵုအခေါင်ကော်ဖျဴ ပွိုင်ကာလ (၃) ဂိတုတုဲ စဴတှ်ေစဴ၊ ၜက်တိတ်အာ နူအခိင်ကာလစၟတ်လဝ်ဂှ်မ္ဂး ဒုဟ်ဒဏ်ဇၞော်ဇၞော်မွဲသာ် သွက်ဂွံဖျေံနွံရ။
မွဲနဲပၠန်ဂှ် လုပ်ယိုက်ဂၠေင် ပ္ဍဲဂကောံပၠန်ဂတးတအ်ဟာ၊ ဂၠံင်ဏံဂှ် ရံင်ကေတ်တုဲတုဲကၠုင်တေံမ္ဂး မၞိဟ်ဗွဲမအောန်ဟေင် ချပ်ကၠုင်နွံရ။ လၟိဟ်ဂၠိုင်ဂၠိုင်ဂွံချပ်လဝ်ဂှ် ဒှ်ဝါတ်ညိရ။ သှေ်မွဲနဲပၠန်ဂှ် ဒုင်တပ်တပ်တုဲ လုပ်ယိုက်ဂၠေင် ကေတ်တာလျိုင်ရ။ နဲ ဏံလေဝ် မၞိဟ်လ္ၚဵုဟေင် နွံမာန်ရ။
သရောပ်ကေတ်ပိဂၠံင်ဏံမ္ဂး ဂၠံင်ဂြိပ်ပါဲဓလေတ်အာဍုင်သေံ/ဍုင်မ္ၚး ဒြဟတ်ဂၠိုင်ဂှ် ဟွံဒးထေင်ခယျရ။ ဆဂး နဲဏံဂှ် မၞိဟ်သှေ်ပ္ဍဲသ္ၚိ မိမဂှ် ဒးဒုင်ကရေပ်ဂရတ် ဒးဒုင်ဒုဟ်ရ။
ဂကောံပၠန်ဂတးဂမၠိုင်တအ်ဂှ် ဗတိုက်သရိုဟ် လမျီုတမ်ရိုဟ်ကၞက် တၠအဝဵုပၞာန်တအ် ဟွံမာန်ဏီဂှ်တုဲ ဝိဝဲပရေင်ဒးယိုက်ဂၠေင်ပၞာန်(ဗၟာ)ဏံ အသိင်ဍေံသၠုင်ကၠုင်သၠုင်ကၠုင်တုဲ မွဲတ္ၚဲမွဲအခိင် ရမျှာင်ကော်ဘိက်ဍေံ စိုပ်ကၠုင်လ္တူသ္ၚိမာန်မံင်ရောင်ဂှ် ဒါတ်တိဟွံဗၠေတ်ရောင်။
အခါဂှ်မ္ဂး သၟတ်အဝဲစိုပ် (၁၈) သၞာံတအ် အာဂၠံင်လဵုရော – သွက်ဒးချပ်နွံမွဲဂၠံင်ဏီဂှ် အခိင်ဗော်ဍုင်မန်တၟိ ကေတ်လဝ်ဓဝ်ၜိုဟ်လလမ် ရပ်လဝ်ဝါဒအကြာဏံ လ္ပာ်ရဲပၠန်ဂတးလေဝ် ဟွံမိက်အာဏီဒှ်မ္ဂး လုပ်ကေတ်တာလျိုင် ပ္ဍဲဗော်ဍုင်မန်တၟိဟာ၊ ဗီုဂှ်ဟွံသေင် လုပ်ယိုက်ဂၠေင် ပ္ဍဲဂကောံပၠန်ဂတးမန်တအ်ဟာ၊ ဂြိပ်အာဍုင်သေံ/ဍုင်မ္ၚးဟာ၊ သာ်ဂှ်ဟွံသေင် ဒုင်တဲသၟဝ်သၞောဝ်ဍေံတုဲ လုပ်ကေတ်တာလျိုင်သ္ပပၞာန်ဗၟာဟာ အလုံသၟတ်တအ် ဟိုဲ။